Serena-i'n fiahna paltlang

Nimin Australian Open inkhelah Serena Williams chuan fiahna hautak a hmachhawn a, seeded 10-na hian harsatna paltlangin Anastasia Potapova a hneh - fourth round a inhlangkai.

Seeded 10-na, a vawi 24 nana Grand Slam nomawi chawi tum Serena-i'n set khatna a hloh teuh hle. Mahse, darkar khat leh minute 37 an khelh hnuah world number 101 lakah hian 7-6 (7-5), 6-2 in hnehna a chang.

Set khatnaah hian 5-2 in Serena a hniam zawk a, set point vawi hnih ngawt a inchhanhim a ngai. Hun pawimawh laiah erawh tawnhriat ngah leh player ṭha zawk a nihna a lang, Pathianni hian seeded pasarihna Aryna Sabalenka nen an inhmachhawn leh dawn.

Australian Open vawi sarih champion tawh Serena chuan, "Duhthusama ṭhain bul chu ka ṭan lo ngei mai, mahse hun harsa aṭanga kan thawh leh chiah hian hnehna chan hi a lawmawm ṭhin," tiin a sawi, fourth tound paltlang tur chuan a hautak zual tur thu a sawi bawk.

Kum 39 mi Serena hian major title 24-na la turin match li chauh chak a ngai tawh tihna a ni a, a hlawhtling thei a nih chuan Margaret Court (24 titles) nih rualin Grand Slam champion hnem ber a ni ang.

Inkhel dangah Naomi Osaka erawhin harsatna lian tham a tawk lo. Japanese nula hian Tunisia player Ons Jabeur chu 6-3, 6-2 in a hneh. Seeded pathumna hian a match hmasa pathumah hian set a la hloh lo a, tie break pawh khelh ngai loin a tlang thei vek a ni.

Kum 23 mi Osaka hian Inrinni chhunah Garbine Muguruza a hmachhawn leh dawn. Spanish nula hian minute 58 chhung lekin Zarina Diyas 6-1, 6-1 in a hneh, ani pawh hian match pathumah game 10 chauh a la hloh avangin khel ṭha tluang ber zinga mi a ni hial.

Nimin tlai khan seeded pahnihna Simona Halep a inlan a, champion tura rinkai hian a khingpui seeded 32-na Veronika Kudermetova chu 6-1, 6-3 a hnehin third round a paltlang ve bawk.

Australian Open-ah hian nitin a hmuna entu mi 30,000 an awm thei a, court hrang hrangah an insemdarh ṭhin. Vawiin aṭang erawhin entu an awm thei leh dawn rih lo, hna thawktute thlenna hmunah coronavirus kai an hmuhchhuah vang a ni.