Liverpool tlawm laiin City an chak chiang

Inrinni zan Premier League inkhelah champion lai Liverpool an tlawm leh ta a, league match thum chhung a zawna an tlawmna ni turin Leicester City chu 3-1 in an ngam lo. 

Reds tan Mohamed Salah chuan mawi tawkin goal hmahruai a khung a, mahse, Foxes hian second half-ah James Maddison, Jamie Vardy leh Harvey Barnes hmanga chhangletin a tawpah 3-1 in an chak ta daih!

Liverpool an tlakchhiat mek laiin Manchester City erawhin, "Chawl thei kan ni lo," tih hla sa chungin hma lam an pan zel a, Tottenham Hotspur chu 3-0 ngawtin an sawp. 

Jurgen Klopp-a leh a naute an tlawm laia Pep Guardiola enkawl team an chak leh tak avangin Premier League champion tur chu a chiang tawh hial anga sawi theih a ni - Spurs lakah hian tunlaia form em em mai Ilkay Gundogan chuan goal hnih a khung a, Rodri chuan penalty hmangin a khung ve bawk. 

Klopp-a'n Leicester an lenchilh hmain inbuatsaihna hun ṭha an neih theih thu a sawi a, a inringtawk hle - Foxes-in FA Cup fifth round an khelh laiin Reds erawh an tla tawh a, Premier League atan hahdam takin an inbuatsaih thei.

Mahse, beisei angin Liverpool goal nawr a na tawk lo a, season hmasa lawka team hmuhnawm tak kan hmuh ṭhin kha hmuh tur an awm ta meuh lo - minute 67-naa Salah goal hmahruai erawh hahipa fak tlak a ni a, Roberto Firmino-a'n a ke 'magic' hmanga mawi zeta a assist hnuah striker class goal niawm renga mawiin Salah hian a khung. 

FA Cup khel chau Leicester an dul a, Liverpool-in khel ṭha bik lua lo mah se an chak mai rinna a lian hman hle. Mahse, Foxes-in ngaihdan dang an nei a, minute 78-naah an tan hun ṭha a her chhuak.

Penalty pek an nih zet hnuah video assistant referee-in a sutsak a, freekick an hmu ta thung - mahse, he freekick hi Maddison chuan minute 80-naah si phurh sut nan a hmang a, offside vangin pawm ni lo zet mah se VAR hmang bawka ennawn a nih hnuah Foxes lawmna tura thutlukna siam a ni ve ta thung. 

Salah-a'n goal a khunga tlawm mai tura ngaih Foxes an harh thar a, si phurh sutna goal an khung aṭanga minute sarih chhungin goal thum an khung hman - an goal hnihna hi chu Alisson-a 'khilai' a ni. 

City laka chesual tawh Liverpool keeper Alisson hian Reds tana a vawi khat nana bul ṭantu Ozan Kabak-a ball tur chu petchhuah theih beiseiin a tlan chhuak a, Kabak nen an inman tawk loh kara ball tla thla chu Vardy-a'n tlan luhpuiin goal-ah a chantir. 

Vardy-a goal khung lawmna chil per pawh a hul hmain Foxes tan Harvey Barnes chuan a khung ve leh a, hun tawp hmain chak tur a chiang hman - Liverpool an tlawm a, palinaah la awm mah se an hnuaia awm Chelsea, West Ham, Everton leh Aston Villa ten an khelh zat ang an khelh chuan an la lehpel thei. 

Liverpool tan insiamṭhat vat a ngai tihna a ni a, Champions League last 16 match (vs RB Leipzig) leh Merseyside derby (vs Everton)-in a hmuah nghal vangin champion chu sawi loh, 'top four' ringawt pawh Liverpool tan a harsa tawh dawn. Hliam ngah sa Reds hian hliam vangin James Milner an chan zui a, he thu buatsaih a nih thleng hian a chawlh chen tur sawi chian theih a ni lo.

City-in inelna hrang hrangah match 15 chhung chu a zawnin hnehna an chang ta - Inrinni zan khan harsatna nei loin Spurs chu 3-0 in an hneh a, he team bawk hian season tawpah Premier League nomawi an chawi a nih pawhin mak ti suh. 

Manchester khaw club hian minute 23-na lekah penalty an hlawh chhuak nghal a, Gundogan laka penalty a chawi danah Spurs midfielder Pierre-Emile Hojberg a vanduai hle - City tan Rodri a lo pen chhuak a, goal-ah a chantir.

Pep-a enkawl team hi tun hnaiah penalty-ah an ropui lo. Gundogan hi Liverpool laka penalty pet goal lo hlim a ni a, Pep-a'n fiamthuin goalkeeper Ederson chu penalty an hmuh leh chuan an pettir mai a ngaih hial tur thu a sawi. 

Spanish coach hi tam takin a uangah an ngai a, Ederson-a ni ve lo thung - penalty pet rilruk pu chungin a tlan chhuak a, mahse,  Bernardo Silva chuan a ṭhianpa hi goal venhim lama kir leh turin a hrilh!

City-in tun hnaia harhna an chan nana player pawimawh chu Gundogan-a ni a, Inrinni zanah pawh a inthup rei lo. Minute 50-naah Raheem Sterling-a siamsak hmangin an goal hnihna a khung a, goalkeeper Ederson-a ball vawm chu tlan luhpuiin finishing tawih tak hmangin a khung leh bawk. 

German midfielder hian inelna hrang hranga match a hmachhawn hnuhnung 12 aṭangin goal 11-a khung tawh a, a nep lo hle - mahse, Premier League Player of the Month ni lai hi minute 69-naah hliam vangin lakchhuah a ngai zui a, he thu buatsaih a nih lai hian a hliam dinhmun kan hre hman lo. 

City lakah Spurs an ropui lo a, Harry Kane-a'n freekick hmanga woodwork-a tih per dawp tih loh kha chu hmai uanga an chance neih sawi tur pawh an nei meuh lo - November-a team pahnih an intawn ṭum nen kha chuan thawnthu a danglam ta.

November-ah khan Spurs hian hnehna changin league table chung ber an luah zui - City an tlu rei lo. An insiamṭha vat a, Spurs an ngam loh hnua point 45 an hlawh theih aṭangin 41 an hlawh chhuak tawh a, Spurs erawhin khami hnua match 14 an khelh aṭangin point 16 chiah an hlawh chhuak thung. Table lamah pariatna an ni mek bawk a, khua a var lo hle.

Hnehna kan chan theihna tur a ni a, inkhel kan thunun hmanin football hmuhnawm tak kan pho chhuak a ni. Foxes goal hmasa ber kha kei chuan offside-ah ka ngai a, mahse an pawm miau si. Kan goal hnihna chhuah danah kha chuan player pahnih kha an in au tur a ni a, mahse, an in au thawm ka hre lo thung. 

Kan inhawn dar lutuk avangin goal thumna kan chhuah a, ka pawm thei lo. Minute 75 kan khel ṭha a, 3-1 in kan tlawm thung - hei hian kan hmaa chona inchhawp hi chu a hrilhfiahin ka hria. 

Result duhawm tak a ni a, ka player-ten chak an phu a ni. 

Hnehna chan kan phu. Post an rawn tih per a, lut ngat se chuan inkhel thlak danglam thei tur a ni - mahse, kan khelh duh danah erawh kan chiang reng thung. Penalty kha penalty chiang tak a ni a, second half-a kan attack hmasak berah kan khung nghal mai bawk, hetiang hi chu a thleng ve chawk a ni.

Team thatho takin team chau tak min hmachhawn a ni. Game kan thunun a, mahse, post kan tih per - kha goal kha khung ngat ila kan mamawh em em chakna min pek belh ang. Mahse, 'tunlai penalty' ka tih mai ang kha kan chawi a, kan tan chuan a harsa tawh a ni -'tunlai penalty'-ah hi chuan i kut tin pawhin tawk fuh la, penalty spot an kawk mai ang. 

Ka player-te rilru puthmang avangin ka lawm a, ni rei lote liam taa darkar hnih inkhel players rual ka kawl a, mahse, an theihna zawng zawng an pe a, an huaisen takzet a ni.