Lianzuala goal a tawk zo lo

Indian Super League-ah Lallianzuala Chhangte chuan Chennaiyin tan goal khat khung mah se a team hnehna chanpui nan erawh a tawk zo lo a, FC Goa nen 2-2 in an inhnehtawk. 

Chennaiyin hian minyute 13-na lekah Jakub Sylvestr goal ṭha bik hmangin hma an hruai a, an hlim chhung erawh a rei lo hle - minute ruk hnu lawkah centre back Eli Sabia hliam vangin Chennaiyin hian penalty an chawi zui a, Igor Angulo chuan goal-a chantir turin harsatna a tawk lo. 

Minute 40-naah Mizo tlangval Lianzuala'n si phurh sutna remchang a nei a, rang zeta ball a virpui hnuah pet mah se goal sir lamah a kal - second half minute 60-naah erawh Mizo tlangval a vanduai nawn tawh lo. 

Goa keeper Dheeraj Singh a chesual a, Manipur rawlthar chetsual zarah a awmna tur dik taka awm Lianzuala'n goal a khung zui - tun season ISL-a Lunglei tlangvalin goal hnih a khungna chiah a ni. 

Lianzuala goal hmangin Chennaiyin lamin hma an hruai a, mahse, chak tura an inngaih tawh hnu, hun pek belh minute hnihnaah goal an chhuah!

Super substitute hming lem an pek Ishan Pandita chuan si phurh sutna goal hi a khung a, tun season-ah goal li a khung ta - a goal khungte hi bench aṭanga luta a khung vek an ni a,

FC Goa tan chuan chhandamtu tih ngam a ni. 

Chennaiyin tan hian hremna a tawrh zawh hnuah Jerry Lalrinzuala chu starting XI-ah hmuh tur a awm leh ta bawk a, FC Goa lamin Mizo player kawl an nei lo thung. 

Zirtawpni zan ISL inkhelah East Bengal leh Hyderabad chu 1-1 in an inhnehtawk bawk a, Kolkata club tana Bright Enobakhare goal khung chu Hyderabad hian hun pek belh minute hnihnaah Aridane Santana hmangin an sut a, si phurh an sut hnuah Mohammed Yasir hnawhchhuah zui ni bawk mah se Hyderabad-in an tuar hman lo.