Villa chhantu Martinez

Brighton & Hove Albion-in Amex Stadium-ah Aston Villa an mikhual a, Seagulls hian inkhel thunun mah se keeper Emiliano Martinez an paltlang theih loh avangin goal awm loin an inhnehtawk.

Inrinni zan inkhelah hian Brighton-in vawi 26 shot an nei a, Premier League match khata an ngah ber ṭum a ni a, amaherawhchu Villa keeper Martinez a chet ṭhat avangin goal hmuh tur a awm lo.

Arsenal aṭanga Villa zawmtu Martinez hian Alexis Mac Allister, Dan Burn leh Joel Veltman te goal khung tur ṭha takin a dang. Argentine keeper hian tun season khualmuala inkhelah match sarihah clean sheet a nei a ni.

Brighton boss Graham Potter chuan, "Kan khelh ṭhat dan thlirin point khata lungawi a har. Villa keeper a che ṭha a, chutihrualin kan vanneih ṭum chu ni se goal khung tur khawpin chance kan ngah a ni," tiin a sawi.

Seagulls hian match ruk chhung chak loh an nei tawh tawh lo a, point 26 hmuin table-ah 15-naah an awm mek. Villa erawh match 22 aṭanga point 36 an hmuh theih avangin pariatnaah an awm mek.