Messi hoin Barcelona an chak chiang

Barcelona-in La Liga nomawi chu an ban phak maiah a la awm tih pholangin hnehna an chang a, an mikhual Alaves chu 5-1 ngawtin an sawp. 

Catalan club tan Lionel Messi chuan a thiam a la theihnghilh lo tih pholangin goal hnih a khung a, Francisco Trincao leh Junior Firpo-ten goal khat ve ve an khung bawk. Alaves tana Luis Rioja goal khung chu scoreline timawitu chauh a ni.  

Inrinni zana Barcelona inlan hmain Atletico Madrid chuan 2-1 in Granada an hneh bawk a, Spanish top flight league-ah hma an hruai chhunzawm zel - pahnihna Barcelona ai hian point riatin an la sang zawk a, match khatin an khel tlem bawk. 

Nizan khan Real Madrid leh Valencia an inkhel a, he thu buatsaih a nih lai hian result kan hre hman lo - Madrid khaw club hi an chak a nih chuan Barca aia match khata khel tam chungin table-ah pahnihna an ni leh ang. 

Inkhel ṭan aṭanga minute 29-na lekah Barcelona-in goal hmahruai an khung nghal a, Portugal international Trincao chuan Ilaix Moriba hnen aṭanga a ball hmuh ṭha tak chu hmahruaina goal ni turin a khung. 

Kum 21 mi Trincao hian nipui transfer lai khan Braga aṭangin Barcelona hi a zawm a, Catalan club tan match khel ve nual tawh mah se Alaves laka a inlan hi La Liga bika inkhel bul a ṭan hmasak ber a ni. 

Trincao goal khung tur siamsaktu Moriba hi kum 18 mi lek a ni a, Spanish midfelder hi Barca academy chhuak niin Catalan club tana league match-a a inlan hmasak berah assist a nei nghal. 

Barca tan Messi-a'n an goal hnihna a khungah inngai mah se video assistant referee-a inrawlh hnuah pawmsak a ni lo a, first half hun pek belha a khung erawh hnial rual lohin goal mawi bik a ni. 

Alaves tan beiseina siamsak turin Luis Rioja chuan minute 57-naah a rawn khung ve leh a, an phur hman viau - mahse, Trincao bawk inlar lehin minute 74-naah an goal thumna a rawn khung a, Portuguese midfielder hi offside vangin a goal pakhat pawmsak a ni lo zawk mah!

Barca-in an duhtawk mai lo - Lionel Messi-a'n La Liga-a Barcelona tana a match 505 khelhna a ni a, Catalan club tana La Liga match khel hnem ber Xavi record a nih rual - Messi-a'n a record siam chu goal hmangin a lawm chhunzawm a, minute 75-naah a goal hnihna a khung ve leh. 

Trincao goal hnihna hi Messi thawhchhuah a ni a, a hnu lawka Argentine forward goal khung hi goal ropui bik a ni - yard 25 vela hla aṭangin mawi zetin a thlawh lut a, Alaves keeper Fernando Pacheco tan thlir liam mai loh chu tih theih a awm lo. 

Paris Saint-Germain leh Manchester City-ten Messi inkhel an nen a nih chuan nipui transfer-a contract hmang zo tur player lakluh dan ngaihtuahin sum an dap khawm ngei ang - Barca tan Firpo chuan minute 80-naah a khung ve leh a, a tawpah Barca an chak chiang hle. 

Barca inkhelh hmain Atletico Madrid-in 2-1 in Granada an lo hneh fel diam tawh a, Marcos Llorente leh Angel Correa-ten goal khat ve ve an khung. Atletico tan Llorente hian minute 63-naah goal hmahruai a khung a, an hlim chhung erawh a rei lo hle. 

Mualneitu Granada tan Yangel Herrera chuan minute thum hnu lawkah an si phurh a rawn sut ve leh a, Granada tan beiseina a siamsak - mahse, team ṭha zawk an lang chhuak a, minute 75-naah Correa chuan khung ve lehin Atletico an chak. 

Tunlaia striker ngaihven hlawh ber pawl Luis Suarez-a'n goal khung lo mah se khelmualah a la tar lo tih a lantir chhunzawm zel a, 0-0 a nih laiin crossbar a tih per - a vanneih zan erawh a ni lo. 

Barcelona duh loh hnu Suarez hian tun season La Liga-ah match 18 khela goal 16 khungin top scorer a ni mek a, amah hnaih bertu chu Barcelona lama a ṭhianpa Messi niin Argentine forward hian league match 20-ah goal 15-a khung tawh.