Champion leh hmahruaitu an chak lo
Serie A champion lai Juventus leh tun season hmahruai mektu AC Milan te chu Inrinni zan khan an tlawm a, nizan khan pahnihna Inter Milan inlanin an chak a nih chuan table chung berah an awm ang.
Old Lady hi Napoli mualah an lenglut a, minute 31-naa Lorenzo Insigne-a penalty hmangin 1-0 in an tlawm. Milan pawhin result ṭha an nei thei bik lo, kai thar Spezia mualah 2-0 in an chak lo.
Juve an tlawm
Tun hnaiah Gennaro Gattuso an ban dawn tih thu thang a tam, tun ṭumah hian chak lo se la chuan Napoli hian an coach hi an ban ngei a rinawm, mahse hnehna changin palinaah an kai sang - Juve an phak lohna chu point hnih chauh a ni.
Juventus captain Giorgio Chiellini-a'n Serie A match 400-na khelmin mellung pawimawh phun mah se tihsual a nei a, a tihsual vanga an penalty chawi chu an chak lohna chhan langsar ber a ni hial.
Season duhawm hmangtu Alvaro Morata chuan an si phurh sutah inngai mah se, goal luh hmain Chiellini chu a lo offside avangin pawmsak an ni lo. Italian defender tan zan duhawm lo tak a ni chiang.
Napoli lamin an goal neih an venghim thei a, goal an chhuah loh nan keeper Alex Meret a cheṭha hle. Meret hian Federico Chiesa, Morata leh Cristiano Ronaldo te khung tur chu ṭha takin a dansak vek a ni.
Milan chesual
Kum 2018 April thla khan AC Milan chu Benevento lakah an tlawm a, a hnu lamah Serie A kai thar team zingah Milan hneh thei an awm lo, an record ṭha tak hi Spezia mualah tih tawpsak an ni.
Spezia hi 2010 kha chuan fourth division club mai an la ni, nasa taka hmasawnin Serie A-ah pawh an zam bik lo. Giulio Maggiore leh Simone Bastoni te goal hmangin Italian club lian an hneh, table-ah 14-na dinhmun an luah nghal bawk.
Season kal laiah Milan an kaltluang a, vawi thum an chak lohna chiah a ni. Chutih rualin Spezia lakah an goal nawr a na tawk lo, minute 90 chhung target zawna pet an neih miah loh avangin tlarhma lam insiamṭhat an ngai.
Nizan khan Inter leh Lazio an inhmachhawn a, coach Antonio Conte naute hian hnehna an chang a nih chuan tun kar tawpa 'Milan Derby' an khelh hunah chungnung zawk ni chungin an inlan ang.