PSG an chak hram

Paris St-Germain tan awlsam taka chak reng thei a ni bik lo. Inrinni zan French Ligue 1 inkhelah pawh PSG hian point thum hmu turin vanneihna an mamawh tel, an mikhual Nice chu 2-1 in an hneh hram.

Parc des Princes a inkhelah hliam vangin Neymar leh Angel di Maria an inlan thei lo. Mauricio Pochettino-a'n tlarhma lamah Kylian Mbappe, Mauro Icardi leh Julian Draxler te a dah a, goal pawh an nei har lo.

Minute 22-naah Icardi siamsak hmangin German international Draxler chuan goal hmahruai ni turin a khung, mahse mikhual lamin second half tir lamah Rony Lopes hmangin an sut a, Amine Gouiri-a'n bar tih per bawkin hma an hruai let teuh hle.

Team pahnihin goal dang an nei thei mai lo, point an insem dawn niin a lang hman. Amaherawhchu Everton aṭanga loan hmanga an hawh Moise Kean chuan minute 76-naah chakna goal a khung, an goal hnihna pawh Icardi thawhrah bawk a ni.

PSG manager Poch chuan, "Ni 40 chhungin match 10 kan khelh a ngai a, a inhnaihchilh hlawm em avangin match zawng zawng a awlsam lo vek. Harsa tak kara point thum kan hlawh chhuak thei erawh a lawmawm hle.

"Tunah chuan Barcelona nen kan inkhelh tur atan rilru kan pe tawh ang, team ṭha leh khawng tak hmachhawn tur kan nih avangin rilru zawng zawng kan pek a ngai dawn a ni," tiin a sawi.

French champion hian point 54 hmuin league hma an hruai lailawk, nizana Lille inkhel result a zirin pahnihnaah an thla hniam leh thei. Champion beisei zinga mi Lyon erawh Montpellier lakah 2-1 a tlawmin pathumnaah an awm.

PSG-in an duh ber chu Champions League a ni. Season hmasa finalist hian Thawhlehni zanah last 16 first leg khel turin Barcelona an hmachhawn dawn, player pawimawh Neymar leh Di Maria an awm loh avangin hna a hautak sawt dawn.