Argentina kawr nena nomawi chawi loin Lionel Messi hun a liam mai dawn em?

June 24, 1987-a piang Argentine forward hi nakkuma Copa America khelh hunah chuan kum 34 mi a ni tawh dawn a, hetiang kumah hi chuan footballer tam takin boot an khai tawh. Catalan club tana nomawi chawi theih zawng zawng chawitu hian an ram mipuite nomawi hmangin lawmna a siamsak thei ang em tih hriat a châkawm hle.

Lionel Messi thiamzia sawi nawn a ngai tawh lo a, thil tihin a lantir. Pate tana beiseina siamtu a ni a, 5 ft 7in chauha sang nichungin footballer ropui a ni thei a, defender palian leh chak ṭha hmaah a zam ngai lo. 

Khawvel defender ṭha ber ber a tawng tawh a, chung zingah chuan Manchester United vanglaia an defender chhuanvawr pahnih Rio Ferdinand leh Nemanja Vidic pawh an tel. 

Mahse Barcelona jersey noumber 10 hi goal hmangin a theihna lantir a ṭhulh chuang lo a, khawvel club ropui Real Madrid kulhpui Santiago Bernabeu-ah pawh a kawt zawl ang maiin a tlangnel.

Footballer tam takin nomawi lian tham chawi loin career an titawp a, Messi erawhin La Liga nomawi ringawt pawh vawi 10 a chawi tawh. Europe club tana inelna ber Champions League-ah pawh vawi li nomawi chawi tawhin; Copa del Rey (6), Supercopa de Espana (8), UEFA Super Cup leh (3) leh FIFA Club World Cup (3) nomawiah te a kut thla a awm vek.

Mimal lawmman ni se Messi aia la hnem chuang an awm lo a, mimal chawimawina hlu bera an sawi FIFA Ballon d'Or/Ballon d'Or pawh vawi ruk zet a la.

Chu chauh a ni lo, ram inlena ngaihhlut ber FIFA World Cup-ah Golden ball a dawng tawh. South America huam chhhunga football inelna sang ber Copa America-ah pawh Golden ball a dawng a, mimala chawimawina lak theih chu a kim tiin a sawi theih.

Engtin maw! A la tawk lo maw? Aw, a la tawk lo. Messi hian khelmual chhungah a thiamzia pholang mah se tun hmain khawvelin Pele leh Diego Maradona te an hmu tawh a, Brazil leh Argentina legend te hi chuan an ram World Cup-ah an champion pui. 

Pele phei chuan World Cup nomawi vawi thum lai a chawi a, Maradona-a'n goal ropui leh hand of god hmangin World Cup-ah Argentina a champion pui tawh bawk.

Maradona hi khelmualah a thiamzia sawi vul chuk ṭhin mah se Pele a ropui zawk tih chu thutlukna a ni leh ṭhin a, hemi tehfung ber pakhat chu World Cup a ni. 

Messi erawh World Cup-ah a la champion lo a, mi tam takin Maradona leh Pele aiin a thiam zawk ti ṭhin mah se nomawi zawnga pawimawh ber World Cup a la chawi tlat lo.

Hun liam tawha player-te dah ṭhain tun hun chauh thlir ila, Messi hian tluk loh a la nei cheu. Argentine forward elpui ber Cristiano Ronaldo chuan an ram Portugal chu European Champions leh Nations League-ah a champion pui tawh a, chuvangin Messi ṭantute tana ṭan chhan a awm theih nan Barcelona number 10 hian Copa America tal chu a chawi a ngai a ni.

Rosario, Argentina-ah June 24, 1987 khan Messi hi a lo piang a, kum 13 mi lek a nihin La Masia-a inzir turin Barcelona a pan. Spanish club aṭang hian khawvelin Messi a hre ṭan a, khawvelin ngaisang mah se Argentina mipui ṭhahnem tak 'hero' a ni pha lo. 

Footballer hlawhtling ni tura rim taka a thawh lai zawngin Argentina-in an hmelhriat lo a, an ram mipui tam tak thinlungah chuan Carlos Tevez a tla na zawk.

Thiamna ṭanga teh chuan Tevez leh Messi hi huang khatah dah tur ni lo mah se Premier League-a Manchester United leh Manchester City champion pui tawhtu Tevez erawh Boca Juniors aṭanga chawr chhuak niin Argentina mipuiah a tla na hle. An ramah chuan Messi hi 'Argentine a ni lo, Catalan a lawm a nih' ti pawl an awm a, a dikna chen pawh a awm.

Barcelona chawisangtu Messi hian an ram mipui laka tla na tur chuan kum 1993 hnua inelna lian thama la champion ngai lo Argentina hi Copa America-ah tal a champion pui a ṭul. South America rama inelna lian berah hain Pele leh Maradona te pawh an la champion bik lo a, Messi erawhin nomawi chawi turin hun ṭha a la nei.

Lionel Messi hi a vanduai ve hrim hrim bawk. Kum 2014 World Cup-ah khan Gonzalo Higuain-a'n final-ah hun ṭha hlah lo se nomawi chawi thei dinhmunah a ding a, Copa Amercia-ah lah 2015 leh 2016 final-ah an chak lo.

Kum 2015 final-ah Argentina leh inelna thlengtu Chile te goal awm loin an inhnehtawk a, penalty-ah Messi chiahin La Albiceleste tan a pet goal. Copa America kum 100 lawm nan kum 2016-ah inelna neih lehnghal a ni a, final-ah Chile leh Argentina te bawk an inhmachhawn. Hun pangngaiah goal lut lo lehin penalty-ah Chile an vannei a, Argentina tana pet goal lo zingah Messi a tel.

Messi a insum zo ta lo. Inkhelh banah Argentina captain chuan, "Ka tan chuan ram tana inkhelh hun chu a tawp ta! Ka theihna zawng zawng ka hlan a, champion loa chawlh hi a na hle," tiin ram tana inkhelh a chawlhsan thu a puang. Copa America-a Chile champion aiin Messi chawlh thuin ngaihven a hlawh zawk a, hei hi a ropuizia nemnghettu a ni.

Chawl tura thutlukna an siam meuh chuan Argentina-in an ram captain hi let leh turin an ṭah awh a, chung zingah chuan hetih hunlaia an ram president Mauricio Macri pawh a tel. 

Buenos Aires mayor Horacio Rodríguez Larreta chuan Messi koh let nan Argentina capital-ah a lim a dah hial a, 'NoTeVayasLeo' (Liam suh, Leo) tih thupui hmangin Argentina mipuiin an tlem a, July 2-a Messi koh let a nih theih nana pung khawm pawh mipui 50,000 zet a ni.

Messi-a'n ram tana inkhelh chawlhsan a puan aṭanga kar khat hnu lekah thutlukna a sut a, September 1, 2016-ah ram tan 2018 World Cup qualifier-ah inlanin Uruguay lakah goal awmchhun a khung. 

Amaherawhchu, Argentina mipui duh ber nomawi erawh a la hlawh chhuak thei lo. 2018 World Cup-ah round of 16 thleng mah se champion zui ta France hneh loin an tla, 2019 Copa America-ah pawh champion zui ta Brazil hneh loin an tawpna chu semifinal a ni. 

Argentina captain Messi hi a kum a upat ve zel avangin hun tam a nei tawh lo a, a vanglai a pelh ve hret hret avangin a club khelhna Barcelona pawhin tun hma an pha thei tawh lo. Chutichung chuan Messi hi Argentina beiseina meichher chhi nungtu a ni a, nakkuma khelh tur Copa America hi an ram leh Colombia-in an inthlen ṭawm dawn avangin champion turin beiseina sang tak a nei ang.