Philippe Coutinho: Bayern-ah a hlawhtling dawn em?

Nipui transfer-a mipui barakhaih ber pawl chu Philippe Coutinho-a'n Bayern Munich a pan hi a nih a rinawm a, rin loh karah Germany a pan. 

Brazilian midfielder hi chhuak tur anga sawi thawm awm reng mah se Bayern hming erawh a ri lawk lo. Barca-in Neymar mana Paris Saint-Germain pek tel an tum te, Manchester United, Tottenham Hotspur leh Arsenal-in an rim thu te erawh a khat tawkin kan hre reng. 

Mahse, Brazil international hian age level aṭang tawha ram tana a khelhpui Neymar mana kal tel a duh lo a, United, Spurs leh Arsenal lah Liverpool elpui team-a luh a duh loh avangin a hnar bawk. Leroy Sane rimtu Bayern an lo lang nawlh a, Coutinho pawhin a hnial lo - Bayern leh Barca an inrem a, Bundesliga-ah Coutinho hmel kan hmu dawn ta. 

Kum 27 mi midfielder loan-a hawh nan hian German club-in pound maktaduai 7.78 an pe a, season tawpah an duh a nih chuan pound maktaduai 109.84-in an lei thei bawk ang. 

German champion hian Coutinho hlawh hi an pe vek dawn bawk a, Liverpool midfielder hlui hian Barca-ah kar khat chhungin £240,000 a hlawh niin an sawi. Bayern sum sen zat ngaihtuahin Coutinho hi squad tikim tur chu a ni lo tih a chiang a, Bayern chief executive Karl-Heinz Rummenigge chuan, "A hming vang ni loin a quality vanga lalut kan ni," tiin a sawi bawk. 

Zawhna lo awm ta chu Coutinho hi eng ang takin nge Bayern hian an chhawr ang tih chu a ni a, Barcelona-ah chuan tlarhmaah Lionel Messi leh Luis Suarez nen inkawptir ṭhin an ni. 

Jurgen Klopp-a'n Liverpool-ah 4-3-3 a hmang ṭhin a, tlarhmaah ni loin midfield pathum zingah Coutinho a khel ṭhin - hei hi a hlawhtlin chhan ber ang hial pawhin a sawi theih. 

Valverde-a'n tlarhma lamah a lo chhawr tam si a, Coutinho hi a buai ta deuh em ni aw, tia zawhna awm thei a ni - hei hi thlir chuan Bayern hian mual sir lama dah an ngam lo mai thei. Tun dinhmuna a lan danah chuan Coutinho hi Robert Lewandowski hnungah attacking midfielder tura dah a nih a rinawm a, hei hi a ṭhat dan ber tih hiala sawi theih a ni. 

Coutinho hi Barca ang thoin mual vei lam sirah chhawr a ni thei tho - Catalan club-ah hian hlawhchham ang ngawta sawi a rem lo a, match 75-ah goal 21 khungin assist 11 a nei. 

Coutinho hi Bayern-ah jersey number 10 pek a ni a, Brazilian midfielder chuan, "Bayern-a jersey number 10-in hmun pawimawh a chan dan ka hria. Football nena inrem tak Robben-a hak ṭhin number a ni a, min beisei anga khelhchhuah theih ka beisei," a ti. 

Kum 27 mi Coutinho hi a jersey number angin role pek a nih a rinawm ber a, Copa America-a Brazil a champion pui pawh khan number 10-ah dah a ni - a khel ṭha hle. Coutinho hian Liverpool tana a season hnuhnung pathumah match 99 a khel a, goal 38 khungin assist 24 a nei - minute 104 dan zela goal-a inrawlh a ni. 

Anfield-a a record ropui hi Bayern-in neih let leh tum ber tur chu a ni dawn a, 'number 10' hi chung zawng zawng hlawhtlinna tura kawng hnai ber a ni, tiin a sawi ngam. 

Coutinho-a'n Barcelona-ah beisei a phak lo a, Catalan club-a thil thleng theihnghilh a duh. Inter Milan tan pawha lo khel tawh midfielder chuan, "Barcelona-ah khan kan beisei angin thil a kal lo a ni," a ti. 

Bayern-ah a hma hun a nghat tawh tih sawi zuiin, "Barca chu thil hlui a ni tawh a, he hmunah hian nomawi tam tak chawi turin ka lokal a ni," a ti a, German champion team-ah cham hlen a duh. Coutinho hian Bayern-ah nomawi chu a hlawh chhuak ngei ang tih a rinawm a, mahse a hlawhtlinna ber an tehna tur chu mimal hlawhtlinna piahlamah Champions League a ni ang. 

Bayern hi 2012-13 a treble champion an nih hnuah Europe-ah an champion leh tawh miah lo. Pep Guardiola meuh pawhin Champions League-ah chuan a hlawhchhampui tih theih a ni a, Coutinho hian a champion pui leh thei a nih ngat chuan Arjen Robben leh Franck Ribery ngaiin Bayern fans an kun lo ang.