Premier League nomawi kan duh - Arsenal director

Arsenal director Josh Kroenke chuan tun hnai khan an club chanchin tam tak a sawi chhuak a, chung zingah chuan nipui bazar hun an chet lak dan leh an hmachhawp a sawi chu mipui ngaihven hlawh zual a ni.

May thla tawp a ni a, Azerbaijan khawpui Baku-ah Europa League final khelin Arsenal leh Chelsea an inhmachhawn. Gunners hian second half-ah goal li ngawt chhuahin an elpui lakah an zawr; he inkhel result hian club neitu thinlung a ti keh a, an dinhmun en let tura rilru an siam bul ṭanna pakhat a ni nghal.

Media lamin nipui bazar nan Arsenal-in pound maktaduai 45 bawr bak an nei lo tih chu an chaw tui ber a ni a, he thu hian Gunners fans lam a ti chiaiin a ti thinur bawk - a nihna takah chuan Premier League club lian dangte an elphak leh dawn lo niin an ngai hman.

Mahse, bazar hun a lo thleng a; Arsenal ṭantute chu 'hnung lama sa barh' ang mai an ni. An beisei loh leh rin phak loh player an lalut a, league match hmasa pahniha hnehna an chan bawk avangin tun dinhmunah chuan, "An ka pawh zen ila, min seh lo ang" tih tur khawpin an awm mek.

American billionaire Stan Kroenke fapa Josh chuan, "Chelsea hneh loa Baku aṭanga kan haw khan coach Unai Emery, managing director Vinai Venkatesham leh head of football Raul Sanllehi te nen kan inbia a, transfer-ah ṭan lak kan ngaih thu ka hrilh. Anni hian an hmelhriat ṭhate be kualin kan ṭhatna tur ngaihtuahin hna an thawk nghal.

"Champions League khel lo mah ila Arsenal Football Club tana khel tlak, hmasawn duh leh kan mamawh mi kan zawng khawm a ni," tiin tun dinhmun chauh ni loin hun lo kal tura tan team nghet tak din an tum thu a sawi bawk.

An mamawh leh duh ang an hmu dawn lo nia an hriat vangin Arsenal ṭantu pawl hrang hrangte chuan lehkha dengkhawng tak an ziak a, London khawlaiah an club neitu an duhkhawp lohna an lantir fo bawk.

Arsenal director Josh Kroenke chuan, "Pawn lam aṭanga nawrna kan neih vanga sum hmang hnem kan ni lo. Pressure neih vanga club record siam ni ila chuan nakin zelah kan tan a ṭha lo ang, club tana ṭha tur kan ngaihtuah zawk a ni.

"Thlasik bazar hun a lo thlen leh hunah pawh tuna kan kaldan pangngai hian kan kal ang. A harsa lai ber chu dawhthei taka awm hi a ni a, mamawh loh leh ṭhatpui loh tur buaipui chiam hi thil hlauhawm tak a ni a, chutianga talbuai lo tur chuan thluak fim taka hman a ngai," tiin a sawi.

Arsene Wenger-a'n Arsenal a chhuahsan hnu khan a hmun ruak luah thei tur hming tam tak a ri a, an zingah Unai Emery thlan a ni. Spanish manager hian season thum daih contract a ziak, a season hmasa berah Premier Leaguer-ah pangana nihpuiin Europa League final an lut bawk.

Manager chungchang sawiin Kroenke chuan, "Manager ropui tak Arsene-a'n a chhuahsan tak han hnawhkhah kha a awlsam lo. Thawnthu thui leh nghet tak inziak sa chhunzawm ni mah se mihran tan chuan a harsa hle ang tih a chiang. Ka hmuh dan chuan Unai hian hna a thawk ṭha, nitin maia player a kaihhruai dan hi a ṭha ka tiin ṭha tak pawhin a thawh chhunzawm ka ring," a ti.

Arsenal hian an league match hmasa lamah Newcastle leh Burnley te an hneh nghal a, seaosn hmasa an bul ṭan dan nen a letling chiah. Mahse a dawtah Liverpool an lenchilh dawn bakah an hmelma Tottenham Hotspur an mikhual zui bawk ang, a awlsam tawh dawn lo.

Arsenal fan-ten Premier League an sawi apianga an insawi theihna chu 'Invincibles' a ni. Mahse, he an hun ropui tawn aṭang hian ṭhangkhat lian (kum 15) zet a liam tawh. Kum 1989 aṭanga 2004 chhunga vawi nga champion thei hi league nomawi khawih loin an awm rei ta hle.

Season hmasa khan champion Manchester City aiin point 28 ngawtin an hniam zawk a, tun season chhungin nomawi chawi nghal duh mah se an la beisei ngam chiah lo - a sang pali zinga tel chu an tum lian tak a ni. Chawi thei dinhmuna an ding a nih erawh chuan club dang an kian hauh lo ang.

Kroenke chuan, "Premier League nomawi inchuh zinga tel phak hi kan thil tum a ni, a ṭha ber zinga kan tel hnuah nomawi kan beisei zui ang. Inelna dangah pawh hlawhtlin chu kan duh ngei mai, chutihrual chuan league nomawi hi kan duh. Chumi tur chuan kan thawkrim ang.

"Premier League-ah club ropui tak paruk kan awm a, Champions League khel tur erawhin club pali tan chauh hmun a awm. Player langsar tam takin UCL khelh ngei an duh a, chuvangin inelna sang bera inlan mai bakah league nomawi chawi chu kan thil tum a ni," a ti.