Lammualah MPL Kickoff & I Day Football Final Rematch

Mizoram Premier League Season 8-na chu September 5 zan hian Lammualah Kickoff neih a ni ang a, kumin I Day Football final-a inhmachhawn Electric Veng FC leh FC Venghnuai ten 'opening match' an khel dawn.

MPL ṭan hmain Kickoff neih ṭhin a ni a, kumin 2012-a MPL ṭan a nih khan India football legend Bhaichung Bhutia hoin Chanmari YMA Hall-ah kick offf neih a ni.

Kuminah erawh MPL Board chuan MPL 8 Kickoff chu hall chhunga hmang loin Lammualah September 5 zana hman turin thutlukna a siam. MPL8 Kickoff-ah hian MPL player zawng zawngte inlan tur a ni a, khelmualah inhmelhriattirna neih nghal a ni ang. He mi zan hian jersey display bakah cultural item-te nen club tin player-te mipui hmaa phochhuah an ni ang.

September thla êng hnuaiah zai leh lam ngaihnawm leh hmuhnawm tak tak pawh phochhuah tum a ni a, MPL8 khuh hawnna hi ropui taka kalpui tumin MPL Board chuan ruahmanna a siam mek a ni.

MPL Board chuan September 5, 2019-ah MPL ṭan tur thu an tichiang tawh a, nimin khan fixtures an tichhuak. MPL club pariatte hi ṭum dang ang thoin vawi hnih ṭheuh an inkhel chhuak ang a, a tawpah a sang paliin semifinal an khel ang.

League Round hi November 15, Zirtawpniah khelh zawh a ni dawn. Semifinal first leg hi November 21-22 ah khelh tur a ni a, second leg hi November 28-29 ah khelh a ni dawn. Champion zawnna hi December 6, Zirtawpniah neih tur a ni. 

MPL8 hi Lammuala khelh tura rel phawt a ni a, khelmual dang a remchan dan angin MPL Board-in a ṭul angin ruahmanna a la siam leh ang.

MPL hnuhnung berah khan a sang palia awm chu Chhinga Veng FC (33 pts), Aizawl FC (26), Mizoram Police (21) leh  Chanmari FC (21) te an ni. Heng club pali tho hi MPL6-ah khan a sang paliah an awm a, an inrem dan pawh a inan chiah avangin 'Big 4' tih theih an ni.

Amaherawhchu Chhinga Veng ti liantu coach Lalsangzuala Hmar-in Electric Veng FC a pan a, EFC hi MPL ṭan hma inelna I Day Football-ah an champion bakah MFA Super Cup-ah semifinal an lut bawk. Season liam ta khan Electric Veng hian point khat chauhin semifinal an lut lo a, a ṭha zingah dah an phu.

MPL kai thar FC Venghnuai hian inelna an hmachhawn hmasak ber I Day Football-ah final an lut nghal a, semifinal an beisei ngam ang. Amaherawhchu inelna tak tak a dang dawn. Kum 2016 khan MPL kai thar Ramhlun North chuan I Day Football final hial thleng mah se MPL-ah chuan point 12 chauh hmuin pasarihnaah an awm thung.

Tun ṭumah hian Chawnpui FC leh Ramhlun North te hi team nem tura ngaih an ni a, mah se transfer a la tawp lo tih hriat a ṭha. MPL ṭan meuh chuan player an lak dan a zirin a la danglam thei a, chu aia pawimawh chu an training dan leh an player rem dan a ni.

Round 1 - Round hmasa berah hian zan khatnaah match khat chiah a awm dawn a, September 5 zan hian 7:30-ah khelh a ni dawn. Match dang pathum hi September 6-ah chawhnu dar 2:30, tlai dar 5:00 leh zan dar 7:30-ah khelh a ni ang.

Round 2 - Round hnihna aṭangin ni khatah match hnih zel a awm dawn. Inkhel hmasa zawk hi tlai dar 4:00-ah khelh a ni ang a, zan dar 7:30-ah match hnihna dah zel a ni ang. Match timing hi MPL Board-in a rel ṭha a nih loh chuan

round 2 aṭangin tlai dar 4:00 leh zan dar 7:00 ang zela kalpui tur a ni.

MPL Ticket - Inkhel en man hi MPL7 ang thoin Rs 30 a ni ang. Semifinal-ah Rs 50 a ni ang a, final-ah Rs 100 a ni ang. Ticket hi inkhelh dawnah khelmual luhna gate-ah zawrh ṭhin a ni ang.