India leh China inhnehtawk

Olympic Test Event khela thang mek India nula hockey khel thiamte chu China nen goal lut loin an inhnehtawk a, an match hmasa lamah result an neih ṭhat avangin Lalremsiami Hmar telna India hian final an lut.

India hian an match hmasa berah Japan 2-1 in an hneh a, match hnihnaah world number 2 Australia nen 2-2 in an inhnehtawk tawh bawk. China nen an in draw leh tak avangin tlawm nei loin an kaltluang. Thawhlehni zan Oi Hockey Stadium-a inkhelah China tan final lut tur chuan chak ngei ngei a ngai, India tan erawh inhnehtawk pawh a pawi lo. World number 10 India hian inkhel an thunun a, goal erawh an sual chhuak thei bik lo.

India tan penalty corner hmang thiam hmingthang Gurjit Kaur hun ṭha neih chu Chinese Goalkeeper Dongxiao Li chuan a lo dansak a, hun tawp dawna Kaur goal khung ngei tur nia lang pawh Li hian a lo dang bawk a ni. Match thum aṭanga point nga hmutu India hi team pali inel zingah an chungnung ber a, world number 14 leh inelna thlengtu ni bawk Japan nen nizan khan pakhatna dinhmun an inchuh a, result kan hre hman lo.

Nakkuma neih tur Olympic atan hmeichhe hockey khel tur ram a la chiang lo, tuna inelna neih hi qualifier tur inbuatsaihna zinga mi a ni. November thla aṭang hian qualifier pangngai khelh a ni ang.