Remsiami'n India champion pui

"Khua a lum lutuk a, khelmuala kan inkhelh lai phei kha chuan thaw a chham lek lek zel," tiin Lalremsiami Hmar chuan Olympic Test Event-a India a champion pui hnuah Vanglaini a hrilh, awlsam takin hlawhtlinna an chang lo tih a chiang.

Nilaini zan khan India nula hockey khel thiamte hian inelna thlengtu Japan chu 2-1 in an hneh a, ram pahnihte 1-1 a an inhnehtawk hnuah Mizo tleirawl Siami goal hmangin India chuan ropuina a chang.

Nakkuma Olympic khel tur hmeichhe team a la chiang lo a, tun hnaia inelna an neih pawh qualifier inbuatsaihna a ni hlawm. Tun ṭuma Oi Hockey Stadium-a inelna an neih hi qualifier inbuatsaihna zinga pakhat a ni.

India hian pool match hmasa lamah Japan hi an hneh tawh, a hnuah team ṭha Australia leh China te an inhnehtawkpui leh bawk. An inkhelh kual hnua a sang pahnih nen final an khel ṭha leh. Final-ah India tan Navjot Kaur (11') chuan goal hmahruai khung mah se inelna thlengtu lamin minute khat a liam hnuah Minami Shimizu hmangin an chhang let. 

Inhnehtawk takin an innawr tawn a, minute 33-ah Gurjit Kaur-i shot chu Japanese goalkeeper Megumi Kageyama chuan lo dang mah se a per hi Siami hmaah a kal a, Kolasib tleirawl hian chakna goal khung nan a hlah lo chiang hle.

Lalremsiami Hmar hi tun hnaiah India player pawimawh a ni phak reng a, a kum la naupang deuh mah se a theihna a san avangin coach ten an thlan hmaih ngai lo. Japan-a inelna an neih ṭum pawh hian match an khelh zawng zawngah a inlan vek a, goal pawimawh bera ngaih a khung bawk.

Vanglaini zawhna chhangin Siami chuan, "Goal khung hi chu a nuamin a hlimawm ṭhin, chutihrualin team pumpui thawhrah a ni a, a hmawr bawktua ka ṭang hlauh kha ka vannei a ni," tiin a sawi, Siami awmna India team hi nimin khan India-ah an rawn haw nghal a ni.

Siami hian India hi Asia Cup-ah a champion pui tawh a, nikum khan Youth Olympic Games-ah India vice captain niin silver medal an hlawh chhuak. Tunah chuan infiamna khawmpui lian ber Olympic khelh ngei tumin inbuatsaihna an nei chhunzawm nghal ang.