Zaninah League Cup semifinal first leg Manchester United Vs Manchester City

Carabao Cup semifinal-ah Manchester khaw club pahnih an inhmachhawn dawn a, zanin dar 1:30 hian Old Trafford-ah Manchester United-in an hmelma Manchester City an mikhual ang. League Cup tia hriat lar inelna semifinal hi double leg-a khelh a ni a, second leg hi January 29, Nilainiah khelh a ni thung dawn. Semifinal hnuhnung zawk hi January 8, Nilaini zanah Leicester City leh Aston Villa ten an khel dawn.

Pep Guardiola awm hnuah Manchester City hi league leh League Cup nomawi pahnih ve ve leh FA Cup-ah an champion tawh. Season liam ta phei chuan Man City hian tualchhung nomawi pathum league, FA Cup leh League Cup an chawi vek.

Spanish manager Pep-a hnuaia Man City an vul chung hian Manchester derby-ah erawh an chak reng bik lo. Guardiola enkawl City hian United hi vawi riat an hmachhawn tawh a, vawi li chakin vawi thum an chak lo. An inhmachhawn hnuhnun ber nikum December  7-ah City hian an mual Etihad Stadium-ah Ole Gunnar Solskjaer hote an ngam lo. 

Nimin tlai press conference-ah Ole Gunnar Solskjaer chuan, "Pep hi ka ngaisang. An theihna sang takah an dah a, midang tan el pha tur chuan tum fe a ṭul tawh ang. Tunah chuan an chak chho leh tawh a, an inringtawk leh tawh bawk," tiin a khingpui turte a fak.

Derby chungchang sawiin Solskjaer chuan, "Derby hi chu a boruak a dang daih a, boruak sangah chuan mahni theihna aia sang pawhin a khelh theih a ni. Old Trafford-a kan khelh tur hi a chanve chauh a ni a, Etihad Stadium-ah inkhelh tur a la awm. Nomawi kan duh a nih chuan derby-a chak hi a ṭul dawn a ni," a ti. 

United hian an player inhliam Paul Pogba leh Scott McTominay te an chhawr theih a la beiseiawm lo a, Wolves nena inhliam Harry Maguire dinhmun a chiang lo bawk.

Manchester City hian season hnuhnung pahnihah League Cup nomawi an chawi ve ve a, he inelna bika an hneh loh hnuhnun ber chu Manchester United an ni. October 26, 2016 khan Juan Mata goal hmangin United-in City an hneh a, an champion zui bawk.

Amaherawhchu United hian FA Cup third round-ah Wolves goal zawnah an pet thei lo a, replay an khelh a ṭul dawn. Man City erawhin harsatna nei loin League Two club Port Vale 4-1 in an hneh thung.

League Cup - Semifinal

First Leg

Zanin Inkhel Tur

Manchester United    1:30 am    Manchester City

January 8, Nilaini zan

Leicester City    1:30 am    Aston Villa

Second Leg

January 28, Thawhlehni

Aston Villa    1:15 am    Leicester City

January 29, Nilaini

Manchester City    1:15 am    Manchester United