Messi a dam tawh, Barca an inlan dawn

Lionel Messi tel loin Barcelona-in La Liga bul an ṭan a, match hmasa berah Athletic Bilbao chu 1-0 in an ngam lo - sawiselna a ri ring nghal hle. 

Mahse, Messi hian Nilaini khan club training a zawm leh tawh a, Pathianni zan dar 12:30-a Real Betis an hmachhawn hunah a inlan thei tawh dawn. Pathianni zan dar 10:30-ah vek hian Atletico Madrid an inlan dawn a, khualmualah Leganes an lenchilh dawn a ni. 

Barcelona elpui ber tura ngaih Real Madrid chu zanin dar 10:30-ah an inlan dawn bawk a, chak result nena bul ṭan team hian Real Valladolid an mikhual ang. 

Nilaini khan Barcelona chuan twitter-ah Messi training lai thlalak an pholang a, "Training nei turin a lo kir ve leh ta," tih an ziak tel. 

Real Betis chuan hei hi an chhanglet vat a, "Leo, in dim rawh, hmanhmawh duh suh," an ti! Betis hian Messi tel leh tel loin inkhel a thlak danglam theihzia an hai lo a, fiamthuin Messi chu chawl rih turin an ti! Mahse, Barca hian thu lawmawm an neih rualin thu hriat nuam lo an nei tel. Match hmasa bera inhliam Luis Suarez leh Ousmane Dembele te an inlan theih a beiseiawm lo. 

Nipui transfer-a Barca pantu Antoine Griezmann chu Messi piahlama player pawimawh tur a ni dawn a, anmahni ve ve pawha danglamna thlen thei khawp player an ni. 

Barcelona tan Real Betis hi zuam ngawt chi an ni lo a, Nou Camp-a inlan tur ni mah se he muala an vawk lal len lai tihtawp saktu chu Betis hi an ni tih hriat a ṭha.

November 2018-a Barca-in Betis an mikhual hma kha chuan La Liga match 46 chu an tlawm miah lo - mahse, Nou Camp thlarau hlau ve lo Betis an lo lang a, Barca hi 4-3 in an hneh. Betis hian nikuma Liverpool nena sawi zawm hlawh tak Nabil Fekir an nei tawh a, Espanyol aṭanga an lakluh Borja Iglesias hi season hmasaa league match 37-a goal 17 khungtu kha a ni bawk. 

Nou Camp-ah chak theih a ni tih hre chungin Betis an lenglut ang a, Real leh Atletico awm vena league-ah an awm tih hre chungin Barca-in chak ngei an tum bawk ang.  

Real Madrid hi season ṭantir khan sawi an hlawh a, team boruak fel lo a awm avangin eng ang takin nge season an ṭan dawn, tih chu zawhna a ni.

Mahse, Zinedine Zidane enkawl club hian match hmasa berah 3-1 a Celta Vigo hnehin bul an ṭan a, team boruak a ṭha tawh tih lantir nan chhuak tur anga sawi Gareth Bale chuan inkhel bul a ṭan bawk.Hei vang hian zanina Valladolid an hmachhawn turah pawh Real an zamin a rinawm lo a, hriat tel atana ṭha erawh an mikhual tur club hi an match hmasa bera Real Betis hnehtu an ni. 

Real fan-ten hmuh an chak Eden Hazard chu hliam vangin a la inlan thei dawn lo a, Celta laka goal khungtu Karim Benzema chu Lucas Vazquez leh Bale nen bul an ṭan a rinawm. 

Atletico Madrid-in Griezmann chan mah se Joao Felix an nei tawh a, Portuguese rawlthar duhawm hian match hmasa berah a thiamzia a pholan nghal avangin Atletico fan-te an phur hle. 

Felix hi Portugal legend Rui Costa nena khelh dan in ang tia sawi a ni ṭhin a, attacking midfielder chu a khelhna ber ni mah se striker, second striker leh winger anga chhawr theih a ni. Atletico match hmasa berah khan Alvaro Morata nen tlarhmaah inkawp tir an ni a, a hmuhnawm hle. Kum 19 lek ni mah se a technique a dik a, vision a nei ṭha a, team attacking puitu pawimawh tak a ni. 

Season hmasaa Benfica tana goal 20 khungtu hi a theihna anga a khelh phawt chuan a thiamzia hriattir kan ni zel dawn a, Leganes khelmualah Atletico fan-ten hmuhnawm ti taka thlir leh an duh ang.