Solskjaer-a'n Pogba a chhan

Manchester United chu an Premier League match hnuhnung berah Wolverhampton Wanderers nen 1-1 in an inhnehtawk a, Paul Pogba-a'n penalty a hlah. Ole Gunnar Solskjaer hote hian zanin dar 7:30 hian Crystal Palace an mikhual ang.

Nimin tlai khan Solskjaer chuan, "Paul Pogba hi a rilru a huaisen a, social media lama sawiselna vangin a buai phah lo. Thi tura in vau leh vun rawng inhmuhsitna hi a ṭha lo a, 'online' kaltlanga tiṭhinte hi kan tihtawp theih nan thu ṭha kan pholan tam a ṭul. Mi dawihzep tak takin hming thupin thu deng khawng tak tak an ziak a, ka thuziak phuahchhawp thlengin a awm, thuneituten hma an lak a ṭul," tiin French midfielder harsatna tawh a sawi chhuak.

Penalty chungchang sawi zuiin United boss chuan, "Player kutah ka dah tawp a ni lo a, pet thei tur mi pahnih kan ruat zawk a ni. Season tluanin an khel vek dawn lo a, an khelh loh ṭum pawhin penalty kan hmu thei - tuna kan ruat hian an chungah rinna kan nghat tih a lantir. Pogba hian penalty aṭangin United tan a khung leh ang," tiin Premier League-a vawi 11 penalty a pet aṭanga vawi li hlahtu French midfielder chungah rinna a la nghah ngam thu a sawi.

United khingpui tur Crystal Palace hian Everton nen goal awm loa an inhnehtawk hnuin kai thar Sheffield United chu 1-0 in an hneh lo a, pawisa thap lam buaipuitute chuan Eagles manager Roy Hodgson chu Premier League manager zingah ban hma tur zingah an tel - Newcastle manager Steve Bruce dawtah chiah a awm.