Serena leh Sharapova inhmachhawn dawn

US Open inkhel tur chu Ningani zan khan pawh a ni a, first round-ah Serena Williams leh Maria Sharapova an inhmachhawn nghal dawn. Hmeichhe tennis player ropui leh hlawhtling pahnih hi New York khawpui bikah chuan an vawi khat intawnna tur a ni.

Grand Slam vawi 23 champion tawh Serena leh Sharapova hi tun hmain vawi 21 ngawt an inhmachhawn tawh, an intawn hnuhnung ber erawh 2016 Australian Open daih tawh kha a ni, a hnu lamah thil tam tak a thleng leh tawh.

An vanglai chuan player hmunawm leh ṭha ber zinga mi an ni a, an ṭhat lai ber pel tawh mah se mipui en châk an la ni reng.

Tun hnaiah Serena hi a hnungzâng na vangin a buai, a khingpui tur Sharapova pawh dar (shoulder) na vangin a inkhel tam tawk lo - January thla hnu lamah match ruk chauh a la khel. World number 1 leh seeded pakhatna ni bawk Naomi Osaka chuan a match hmasa berah Russian tleirawl Anna Blinkova a hmachhawn dawn, ani hi tun hnaia khel ṭha tluang ve tak a nih avangin fimkhur a ngai ang. Japanese player tan Belinda Bencic (seeded 13) leh Anett Kontaveit (21) te chu last 16 thlenga khingpui hlauhawm thei tur zinga mi an ni.

Kumin Wimbledon-a player ngaihven hlawh tur pakhat chu Simona Halep a ni dawn. Romanian nula hian Grand Slam title a lak hmain world number 1 dinhmun a luah thei a, sawisel a hlawh nasa ṭhin hle. Mahse, amah sawiseltute chhanlet nan French Open leh Wimbledon-ah a champion tawh, hard court inelna lianah pawh hian nomawi chawi tura rinkai a ni - seeded palina pek niin, a match hmasa berah qualifier aṭanga inhlangkai a hmachhawn ang.