Wolves tan Europe a hnai zel

Premier League team hmuhnawm Wolverhampton Wanderers-in a vawi khat nan Europa League khelh an hnaih zel a, thawnthu ngaihnawm an ziak zel. 

Ningani zan khan Europa League playoff first leg-ah Wolves an inlan a, an mikhualna ramah team ṭha Torino chu 3-2 in an hneh - Europa League khel turin an dinhmun a ṭha ta hle. 

Club langsar dang inkhelah Rangers chuan goal khung loin Legia Warsaw an inhnehtawkpui a, Champions League qualifier aṭanga tla hlim Celtic chuan 2-0 in AIK an hneh thung. 

Feyenoord-in an mikhual Hapoel Be'er Sheva lakah ṭhat an chhuah duh lo a, 3-0 in an sawp. Daniel Sturridge-a club thar Trabzonspor chuan 3-1 in AEK Athens an hneh bawk. 

Wolves fixture a hautak hle. Europa League playoff khel tura Pyunik an hneh aṭanga ni lina lekah Manchester United chu Premier League-ah an mikhual zui. 

Mahse, Nuno Espirito Santo naute hian fixture an nei hautak lo emaw tih mai turin an khel ṭha a, indin thar tum mek Red Devils hi 1-1 in an lo chelh. United an hmachhawn aṭanga ni thumnaah match an nei leh a, Europa League playoff-ah Italian club ṭha Torino khelmualah zin a ṭul. 

Mahse, 1980-81 hnua a vawi khat nana Europa League qualifier khel ve leh chauh team hian an club thawnthuah an hming ziah kai an duh a, Torino lakah an talbuai lo. 

Minute 43-naah Wolves-in goal hmahruai an khung a, Joao Moutinho-a free-kick pet chu Torino defender Gleison Bremer chuan an lamah a tauh lut. 

Wolves tan Diogo Jota chuan Premier League defender-te tan 'warning' pein minute 59-naah an goal hnihna a rawn khung zui zat - hei erawh Torino-in minute hnih hnu lekah Lorenzo de Silvestri hmangin an chhanglet. Mahse, ni 29 chhunga match sarih khel tawh Wolves player-ten tha an thlah lo. Raul Jimenez chuan season hmasa Premier League-a striker 'hot' kha a la ni reng tih pholangin minute 72-naah an goal thumna a khung a, 3-1 a ni. 

Second leg atana Torino beiseina chhi nung turin Andrea Belotti chuan minute 89-naah penalty hmangin a rawn chhuih lut ve a, goal dang lut loin hun a tawp - away-a goal thum khung Wolves dinhmun a ṭha hle.   

Wolves hian playoff thleng turin second qualifying round aṭangin an khel ṭan a, an round khelh hmasak berah Northern Ireland club  Crusaders chu 6-1 in an sawp. 

Third qualifying round-ah 8-0 in Armenian club ṭha Pyunik chu inkhelh an zirtir a, playoff-ah pawh hnehnain bul an ṭan leh ta. Mahse, Wolves manager Nuno Espirito Santo chuan an zinkawng a la tawp loh thu a sawi. Portuguese manager chuan, "A la tawp lo a, team pahnih hi kan la inhnaih hle a ni. 

"Match khat a la awm a, team ṭha tak tum tur kan nih avangin a ṭha thei ang bera inkhel tura kan inpeih a ngai," tiin second leg a thlir lawk - August 29 zanah Torino hi an mikhual ang. 

Scottish club 

Season ṭantirah Celtic-in Champions League mitthla mah se third qualifying round aṭanga hnawhchhuah an nih hnuah Europa League playoff an khel a, an chak. 

Celtic Park-ah mualneitu team hian minute 45 chhung goal an khung thei lo. Mahse, chawlhlawka thu ṭha an ngaihthlak hnuin James Forrest leh Odsonne Edouard-ten second half-ah goal an khung a, Swedish club AIK chu 2-0 in an hneh. 

Rangers leh Legia Warsaw inkhel hmuhnawm mah se goal hmuh tur erawh a awm lo a, team pahnih hi 0-0 in an inhnehtawk. Rangers keeper Allan McGregor chuan vawi thum ngawt save ṭha zet a nei a, Alfredo Morelos-a'n Polish club goalkeeper Radoslaw Majecki a paltlang thei bik lo. 

Steven Gerrard enkawl Rangers-in goal khung lo mah se mahni muala khel leh tur an ni a, tun season-ah an mual Ibrox-ah an la tlawm miah loh avangin ngaihngam takin an awm ang. 

Dutch club ṭha Feyenoord-in Israeli club Hapoel Be'er Sheva-ah hnehna chang turin harsatna an tawk lo a, an mikhual hi 3-0 in an sawp. Leroy Fer chuan goal hnih a khung bakah Sam Larsson chuan goal khat a thawh ve bawk. 

Turkish club Trabzonspor chuan an mikhualna ramah 3-1 in AEK Athens an sawp a, away goal rule nena ngaihtuah phei chuan Daniel Sturridge-a club thar hi tlang chiang anga sawi theih an ni. 

Trabzonspor tan Caleb Ekuban chuan hattrick a siam a, Sturridge erawh club zawm hlim chauh a la nih avangin squad-ah a la awm rih lo. 

FC Copenhagen chuan an mikhual Riga FC chu 3-1 in an sawp a, Ajax rawlthar beiseiawm ni ṭhin Viktor Fischer, Pieros Sotiriou (penalty) leh Mohammed Daramy ten goal khat ṭheuh an khung a, Riga tana Vladimirs Kamess goal khung chu mualpho khuhna chauh a ni.