Australia-in Archer an ngam lo

Third Ashes match ni hmasa ber chu Headingley Stadium, Leeds-ah khelh a ni a, England bowler Jofra Archer khelh ṭhat zarah mualneitu dinhmun a ṭha.

England hi toss-ah chakin bat hmasak an thlang a, Steve Smith tel lohna Australia-in an bat hmasa. Aussies tana run siam tam ber Marnus Labuschagne-a'n run 74 siamin opener David Warner-a'n run 61 siam bawk mah se batsman dang an che thei lo.

Australia hian ni khatnaah hian run 179 an siamin tihin an thi vek a, Archer hian wicket ruk lain run 45 chauh a pe. Aussies opener Warner chuan, "Steyn nen an vawm dan a inang," tiin kum 24 mi Archer hi a fak. South Africa bowler ropui Dale Steyn hian Test cricket-ah wicket 439 zet a siam. Archer chuan, "Fak derna ni mah se ka tan chuan a ropui hle. Dale hian Sussex tana a ka khelh lai khan min rawn twitter kaltlangin min be tawh a, match tam tak khela wicket ṭhahnem tak la tawhin min hria hi a lawmawm duh hle," tiin a sawi.

Test match hi ni nga chhung khelh a ni a, nizan khan khelh chhunzawmin August 26-ah khelh zawh a ni ang. Australia hian Test match hmasa berah hnehna changin match hnihnaah an inhnehtawk a, England tan series la turin third Test lak hi a pawimawh hle.