Anfield-ah Laipui a puak dawn em?

Tun season Premier League match hnih khelh tawhah la tlawm miah lo team pahnih chiah an awm a, Arsenal leh Liverpool an ni. Zanin dar 10:00-ah Anfield-in London club a mikhual dawn a, Gunners-in tlangnel tum dawn viau mah se Anfield-in mikhual lakah ṭhat a chhuah ngai lo. 

Nipui transfer-ah fan-te rin loh takin Arsenal an che ṭha a, result ṭhain a zui. An phur vanglai taka Liverpool hmachhawn tur an ni a, European champion hi an huphurh bik lo ang. Mahse, Arsenal fan-ten hrilhnawn an duh loh tur chu Anfield-a an len hnuhnun ber kha a ni - nikum December khan 5-1 ngawtin an va mualpho. 

Liverpool fan-ten Gunners an mikhual dawn hnaihah chanchin lawmawm an nei a, midfielder Alex Oxlade-Chamberlain chuan a contract neihsa chu kum khat atan pawt seiin 2023 thleng Anfield-ah a cham dawn. 

Jurgen Klopp-a ṭawngkam hriat hlawh leh lar em em chu 'heavy metal football' tih hi a ni a, hei hi Arsenal manager hlui Arsene Wenger nen an khelh dan inan lohzia a sawina a ni. 

Liverpool boss hian, "Arsene chuan ball chan tam a, in pass kual nuam a ti a, hla nem tak sak ang mai a ni. Kei erawh heavy metal fan ka ni," a lo ti tawh a, na taka goal nawr chu thupui berah a nei. Klopp-a'n 4-3-3 formation a hmang ṭhin a, tlarhnung aṭangin game a 'din' ṭhin - goalkeeper thlengin an pawimawh tihna a ni a, mahse hei tak hi tuna an buaina chu a ni. 

Ball pet thiam keeper Alisson a inhliam mek a, amah thlaktu Adrian-a'n hei hi a la man ve lo - hei hian Reds tlarhnung a ti nghing a, Alisson an neih hmaa an buainaah khan an buai a, tun season-a an match neih tawhah chu chu hmuh turin a awm. 

Tlarhma lama player nei ṭha Arsenal tan hei tak hi Liverpool hnehna remchang a ni thei a, tun angah pawh Laipui an tipuak thei lo a nih chuan engtikah nge a nih chuan ang?

Klopp-a khelh dan hi 'heavy metal football' tia kan sawi dawn a nih chuan Unai Emery-a hnuaia Arsenal khelh dan hi 'thrash metal football' tia sawi tur a ni ang. 

Arsenal coach hi Klopp ang thoa attacking football ngainatu a ni a, mahse German coach ang ema gegenpressing nen lama game pho chhuak ṭhin erawh a ni lo. Emery ṭawngkam lar tak chu, "1-0 a chak ai chuan 5-4 a chak ka duh zawk," tih hi a ni a, tun hnaia tlarhnung talbuai Liverpool hi na takin an nawr ang tih a chiang. 

Chutihrualin Emery-a formation hman uar 4-2-3-1 hi attacking football tia sawi theih ni mah se formation 'him' tia sawi a ni ṭhin a, Reds anga attacking na an ni lo. Emery hian 4-2-3-1 nen Liverpool a hmachhawn dawn a nih chuan Burnley laka che ṭha tak Dani Ceballos leh Matteo Guendouzi te midfield-ah an chet ṭhat a ṭul ang. 

Player mal tina lakchhuah tur ni se Arsenal-in Liverpool an la khan lo zawk tiin a sawi theih a, Reds tlarhnungah Virgil van Dijk hoa an din theih laiin Gunners hotu chu David Luiz a ni. 

Tlarhma hi Arsenal-in Liverpool an tluk 'teuh' vena ber niin a lang a, hei hi Pierre-Emerick Aubameyang pawhin hriain, "Pepe leh kei hi Mane leh Salah anga player tlan chak kan ni a, Laca lah Firmino anga ball thiam a ni," a ti. 

Auba thusawi thlen dikna tur chuan Emery-a'n pound maktaduai 72-a a lakluh Pepe hi bul a ṭantir a ngai tawh, 4-3-3 a hman a ngai hial thei bawk. 

Emery chuan, "Pepe hian 15 minutes a khelh hnuah 45 a khel leh a, Liverpool lakah chuan a inpeih tawh mai thei," a ti a, French winger a chhawr theih thu a sawi. Mahse, hei tak hi team pahnihna danglamna ti langtu pakhat a ni leh - Auba, Laca leh Pepe hi an inlan a nih chuan an vawi khat bul ṭan hona tur a ni dawn a, Mohamed Salah, Sadio Mane leh Roberto Firmino erawh European champion ni ho tawh an ni.