Manchester United = Chelsea = 4

Tun season Premier League ṭan chiaha thil thleng langsar chu Manchester United-in an mual Old Trafford-ah Chelsea 4-0 a an hneh kha a ni a, kar hnih dang a liam leh chuan London club leh Ole Gunnar Solskjaer hote point hmuh zat a inang leh der tawh.

Inrinni zan khan Carrow Road-ah Chelsea-in Tammy Abraham (2) leh Mason Mount te goal hmangin Norwich City 3-2 in an hneh a, Frank Lampard hoten Premier League-ah a vawi khat nan point thum an hlawh chhuak. United erawhin an mual Old Trafford-ah Crystal Palace 2-1 in an hneh lo a, Marcus Rashford-a'n penalty a hlah.

Chelsea manager Lampard-a'n player naupang zawk chungah rinna a nghat chhunzawm a, an starting eleven kum chawhrual hi kum 24 leh ni 208 niin February 1994 hnua Premier League bul 

ṭantu naupang ber a ni.

Blues-in Abraham leh Mount te hmangin ṭum hnih hma hruai mah se Norwich-in Todd Cantwell leh Teemu Pukki te hmangin an sut ve ve. Kum 29 mi Pukki hi season liam ta khan Championship-ah top scorer a ni a, Premier League-ah goal nga a khung der tawh.

Lampard hote talbuai deuh mah se Abraham-a'n a pu rinna chu goal hmangin a thungrul a, minute 68-naah Chelsea Academy chhuak hian chakna goal a khung. Hun tawp lamah Blues-in inkhel an thunun a, point thum hlu tak an hlawh chhuak.

Chelsea manager Frank Lampard chuan, "Fiahna hautak a ni a, Norwich hi team ṭha tak an nih avangin an mualah hian point ṭhahnem tak an hlawh chhuak ang. Kan khelh ṭhat angin result kan nei ṭha ṭhin lo a, tunah chuan kan phu ang result kan nei ta," tiin an khelh danah a lungawi thu a sawi.

Manchester United-in Chelsea an hneh avangin Solskjaer hoten beiseina sang tak an nei a, mahse big club ngamtu Wolverhampton Wanderers nen an inhnehtawk hnuah tun season-a chak la nei lo Crystal Palace lakah an tlawm. Chelsea defender hlui Gary Cahill chu a club thar Eagles tan a khel ṭha hle.

Old Trafford-ah United defender Victor Lindelof chuan boruakah Jeffrey Schlupp a hneh loh avangin Jordan Ayew-a'n goal hmahruai a khung a, defender manto pahnih Harry Maguire leh Aaron Wan-Bissaka ten Lindelof hi an pui hman lo.

United harsatna belhchhah turin Luke Shaw chu hliam vangin thlak a ngai a, Jesse Lingard leh a thlaktu Mason Greenwood te tlarhmaah eng ruai an ni lo. United midfielder Scott McTominay-a'n minute 69-naah penalty a hlawhchhuah chu siphurh sutna ni loin buaina belhchhahtu a ni. Wolves lakah Paul Pogba-a'n penalty a hlah avangin nasa takin sawisel a ni a, Chelsea laka penalty pet goaltu Rashford-a'n a pet goal bik loh avangin penalty buaina belhchhain a awm ta zawk.

Minute 89-naah Daniel James-a'n mawi zetin United siphurh a sut a, kum 21 mi James hian hun tawp dawnah United laka siphurh sutna goal a lawm - chak tumna an nei tawk lo emaw tih hial tur a ni. Solskjaer hote tan point khat lawmna tur a ni lo a, mahse an siphurh sutna tura pawimawh Paul Pogba chetsual vangin Patrick van Aanholt-a'n injury time-ah chakna goal a khung a, keeper David de Gea pawh a che ṭha bik lo.

Chelsea leh Manchester United hi an club legend Lampard leh Solskjaer ten an enkawl a, team ṭhatna an ngaihtuah rualin club academy player an chhawr huai dun hle.

Blues tan academy player che ṭha rih mah se kai thar Norwich an hneh ṭawk tih hriat a ṭha a, United pawhin an mualah Palace an hneh lo. Season ṭantirhah la chet sual theih ni bawk mah se an khelh chinah chuan team pahnih hi champion tur ni loin Champions League khelh phaka lawm tur an niin a lang.