Real an chelh; La Liga a ngaihnawm dawn chauh!

Season ṭantir aṭangin La Liga-ah beisei loh result hriat tur a awm nghal zel a, Spanish football-in ngaihven a hlawh lehzual. 

Inrinni zan khan Real Madrid chu an mikhual Valladolid nen 1-1 in an inhnehtawk a, league match hnih an khelh tawh aṭanga an neih zat chu point li a ni. Match hmasa bera Barcelona hnehtu Athletic Bilbao an chak zo bik lo a, Getafe khelmualah 1-1 draw result an hlawh chhuak hram. 

Season hmasa hmang ṭha tak Valencia-in eng ruai an ang bik lo a, match hmasa bera Real laka tlawm Celta Vigo chu 1-0 in an ngam lo. Nizan khan Barcelona leh Atletico Madrid an inlan a, he thu buatsaih a nih lai hian result kan hre hman lo. 

Real Madrid-in transfer bazar-ah thawm duhawm lo an nei nual a, a bik takin Gareth Bale chu coach Zinedine Zidane meuhin chhuak tur a duh thu a sawi. 

Mahse, Bale hi rin loh takin a cham zui a, beisei loh ang takin match hmasa berah bul a ṭan nghal - Getafe chu 3-1 in an hneh a, assist a nei. Match hnihnaah pawh Bale-a'n inkhel bul a ṭan leh a, Zidane-a'n Celta nena an inkhelh zawha a sawi ang ngeiin Real team boruak a ṭha niin a ngaih theih. 

Mahse, pawi ta ber erawh Real team boruak ṭha mah se result erawh a ṭha lo! Madrid khaw club hian minute 82-naah Karim Benzema hmangin goal an khung ve chauh a, goal a luh tlai avangin an chak mai a rinawm. 

Santiago Bernabeu-a fans pungkhawmin an ring sual. Hun tawp nan minute hnih chauh a awm tawh tihah Sergi Guardiola chuan si phurh a rawn sut a, point an insem.

Bale-a'n Real a chhuahsan tak lohah chuan Zidane-a'n a player hi a ṭhat dan bera khel chhuak leh tura a duh thu a sawi a, chance pawh a pe. 

Welsh forward hian match hnihah bul a ṭan ve ve. Zidane chuan, "Player ṭha tak a ni a, a ṭhatzia hi a pholan a hun leh tawh. Kan hriat ṭhin player kha hriat kan duh leh tawh a ni," tiin a lo sawi tawh. Mahse, Bale hian Zidane-a hriat 

ṭhin player a nihna a pho chhuak thei lo a, Cristiano Ronaldo chhuah tirah Real khaiding tura ngaih forward hian Valladolid lakah a team a chhan thei lo. 

Mak takin Real-a tla tlum lo ve tho James Rodriguez chuan inkhel bul a ṭan ve bawk a, Zidane-a'n player pahnih hi eng ang takin nge chhawr a tum zel tih chu hriat chakawm a ni. Hriat tel atana ṭha erawh Eden Hazard a la dam lo a, Belgian forward dam huna Real inrem dan tur hriat a chakawm ta hle.

Santiago Bernabeu-ah Real-in point thum an hlawh chhuak zo lo a, Zidane a lungawi thei lo. French manager chuan, "Kan result-ah hian engtin nge ka lawm theih ang. 

"Minute 83-naah goal kan khung a, mahse kan in draw. Ka thinrim lo thei lo a ni," a ti a, chak tura ngaih tawh hnua goal chhuah chu a hrethiam lo hle. Zidane chuan sawi chhunzawmin, "A harsa ber goal khung kan ti tawh a, holam takin kan chhuah leh lawi si. Ball hloh chu thil thleng thei a ni a, positioning dik loh vanga chhuah erawh hriatthiam theih a ni lo," a ti. 

Real Madrid playmaker James Rodriguez chu minute 57-naah lakchhuah a ni a, Zidane chuan, "Hliam tenau a ni," tiin a ngaihtuahawm loh thu a sawi.