Anfield boruakah Gunners an zam ral

Arsenal-in an boruak ṭhat vanglai takin Anfield an tlawh a, an la ṭhat famkim tawk lohzia hrilhriat an ni - Liverpool lakah 3-1 in an tlawm. 

Inrinni zana intawng team pahnih hi Premier League match hmasa pahniha hnehna chang ve ve an ni  a, Arsenal hi nipui transfer-ah an chet ṭhat bawk avangin fans beiseina a sang. Mahse, Gunners hian Liverpool 'level' an la phak lo. Mohamed Salah chu Arsenal tlarhnung tan mangchhia a ni a, goal hnih a khung. 

Reds tan Joel Matip chuan goal hmahruai a khung a, Gunners tana Lucas Torreira-a'n goal a khung ve meuh chuan si thum an phur fel der tawh. 

Anfield-a team pahnih intawn hmain Gunners striker Pierre-Emerick Aubameyang-a'n Liverpool tlarhma pathum Roberto Firmino, Salah leh Sadio Mane te inkawp an tluk theih thu a sawi. 

Auba duhthusam ang ngeiin pound maktaduai 72 man Nicolas Pepe nen inkhel bul an ṭan a, minute 81-naah Alexandre Lacazette luhtir a ni bawk - Reds tlarhma an la phak lo tih a lang chhuak thung. 

Pepe-a'n Arsenal tana inkhel bul a ṭan vawi khatnaah Virgil van Dijk 'bum' nghal mah se a pawimawh ber goal a keng tel lo a, Ivorian forward hian 'class' tia sawi hlawh tur chuan finishing zir tel a la mamawh. Liverpool goal nawr a na a, inkhel ṭantir aṭangin heavy metal football kan hmu nghal. Minute 41-naah goal hmahruai an khung ta nge nge a, Trent Alexander-Arnold corner chu defender pasang Matip-a'n a tauh lut. 

Arsenal-in chance nei ve bawk mah se an chhawr thei lo a, second half-ah pawh Liverpool bawk chu goal nawr na an ni. 

Minute 49-naah Salah um phak lotu David Luiz-a'n Egyptian forward chelh din dan ṭha bera a hriat chu a kawra 'pawh' a ni a, Reds-in penalty an hmu phah - a hlawh chhuaktu Salah chuan chiang zetin a pet goal. Minute 58-naah Salah bawk a lang a, chiang zeta Luiz a bum hnuah striker goal dik tak a khung. Anfield-ah Brazilian defender a mualpho a, Frank Lampard-a'n a chhuah phal chhan a lang. 

Arsenal tan Torreira-a'n khung ve zuk mah se Gunners beng harh turin a tawk lo. Unai Emery-a'n, "Duhthlan theih ni se Liverpool hi hmachhawn miah loh kan duh," tia a lo sawi tawh chhan a lang. 

Nipui transfer-ah Liverpool an bazar tam lo. Mahse, he team hi season hmasa Premier League-a point khat leka Manchester City phak lotu leh European champion an ni a, tawh an la khirh reng. Klopp-a'n ṭum dang ang thoin 4-3-3 a hmang a, mahse Arsenal-in tlarhma an nei ṭha ve tho tih hriain midfield-a player pathum zingah tlarhnung ven thiam Jordan Henderson leh Fabinho a luhtir. 

Emery erawh duhthlan tur a la ngah tawk lo - tlarhnung an neih dan thlir phei chuan Reds laka goal thum an chhuah hi a mak lo a, Nacho Monreal, Luiz, Ainsley Maitland-Niles leh Sokratis Papastathopoulos intlar hi an ṭha tawk lo. 

Midfield-a Joe Willock, Dani Ceballos, Granit Xhaka leh Matteo Guendouzi inkawp hi champion pui tur khawp an ni lo tih a hriat a, Emery hian tlarhmaa Auba, Pepe leh Laca-te an khelh ho theih dan tur a ngaihtuah vat a ngai niin a lang tel bawk. 

•    October 2015-a Klopp-a'n Liverpool a enkawl hnuah Arsenal vawi riat an hmachhawn tawh a, goal 26 an khung - hetih hun chhung hian Premier League-ah team pakhat laka heti zat goal khung thei an awm lo. 

•    Anfield-ah Arsenal-in goal 62 an chhuah tawh a, Premier League-a khualmuala team pakhat laka goal chhuah tam lamah Emirates Stadium-a goal 64 chhuahtu Everton chiah an phak lo. 

•    Arsenal-in league away-a Big Six an hmachhawn hnuhnung 23-ah hnehna an chang miah lo (D8 L15) a, goal 53 chhuahin clean sheet vawi khat chiah an nei. 

•    Klopp-a'n Premier League-a Arsenal a hmachhawn tawh pariatah (W5 D3) a la tlawm miah lo. 

•    Premier League-a Virgil van Dijk inlan hnuhnung match 50-a bum thei hmasa ber chu Nicolas Pepe a ni. 

•    Liverpool-in a zawnin league-ah vawi 12 hnehna an chang ta a, Kenny Dalglish (April - October 1990) ho top flight football-a chak zawn rei record an lo siam tawh chu an nihrual. 

•    Trent Alexander-Arnold-a'n Anfield-a match a khelh hnuhnung 10-ah assist vawi kua a nei.