US Open Champion lai Djokovic a inlan dawn

Tennis season kal laia Grand Slam hnuhnung ber US Open chu zanin aṭang hian inelna tak neih ṭan a ni dawn a, champion lai Novak Djokovic chuan a match hmasa ber atan dar 10:45 hian Roberto Carballes Baena a hmachhawn nghal ang.

New York khawpui chhunga tennis stadium hmingthang leh lian ber Arthur Ashe Stadium chu inelna neihna hmunpui a ni leh dawn a, stadium hi a chung khuhna ṭha tak nei a nih avangin he hmun bika inkhel tur hi chu ruah sur vangin buaina tur a awm dawn lo.

Inrinni khan Djokovic hi a training-na hmunah a ke dinglam a durh a, vawi hnih ngawt enkawl a ngai. Hliam na tak ni lo mah se Serbian tlangval tan awm tinuam lo tur chu a ni thei ang.

World number 1 Djokovic chuan, "Thil lian tham a ni lo, inelna hmachhawn harsatna tur khawp a nih loh ka beisei. Training-na hmunah erawh indim a ngaih avangin vawi hnih chu ka chawlh phah," tiin a dinhmun a sawifiah.

Inelna lian hnuhnung Wimbledon-ah khan Djokovic hian Roger Federer lakah match point vawi hnih inchhanhimin nomawi a chawi a, tun ṭumah pawh hian champion tura rinkai zinga mi a ni.

Wimbledon hnuah Djokovic hian inelna pakhat chiah a hmachhawn, Cincinnati Masters-ah quarterfinal a thleng a, season dang ang chuan hard court-ah inbuatsaihna a nei ṭha tawk lo - US Open nomawi kawl mektu a ni tih erawh hriat a ṭha ang.

Thawhlehni zing dar 5:45-ah Roger Federer a inlan dawn a, Swiss star hian Sumit Nagal a hmachhawn dawn. Federer-a'n Grand Slam nomawi 20 zet a neih tawh laiin India tlangval erawh major tournament-a a inlan vawi khatna tur a ni thung, an dinhmun a inthlau hle.

Kum 38 mi Federer chuan, "Season kal laia ka taksa dinhmun a ṭhat ber lai a ni hial ang, inelna lian US Open khelh pawh a châkawm tawh hle. Inelna hmachhawn tur hian ka inpeih, New York-ah hian hun hlimawm leh lungngaihthlak ka tawng hnem tawh, kumin chu a lawmawm lam a nih ka beisei," a ti.

World number 3 Federer-a hmachhawn tur Nagal hi qualifier aṭanga inhlangkai a ni a, season hmasa khan French Open leh Wimbledon-ah qualifier khel mah se main draw a in vaw kai zo lo, atan chuan tun ṭuma first round khelh hi chanchin lawmawm a tling phak.

Kum 22 mi Nagal chuan, "Tennis player ropui berte zinga mi nen kan intawng tur hian min ti phur hle," a ti. Nagal bakah hian Prajnesh Gunneswaran chu main draw a invaw kai bawk a, Leander Paes leh Mahesh Bhupathi te 1998 Wimbledon-a an inlan hnuah Indian tlangval singles player pahnih Grand Slam-a an tel kawp lehna hmasa ber a ni. 

Hmeichhe singles first round fixture ngaihven hlawh ber Serena Williams leh Maria Sharapova te Thawhlehni zing dar 4:30-ah an intawng dawn a, player ropui pahnih hi chak zawk tur rin thiam a harsa - tun hnaiah hliam vanga buaina nei ve ve an ni.

World number 1 leh seeded pakhatna ni bawk Naomi Osaka chuan a match hmasa berah Anna Blinkova a hmachhawn thung dawn, Japanese nula Osaka hi Australian Open hnuah a la chet fuh rih loh avangin a nomawi kawl lai humhim tur chuan thapui tawh bakah vanneihna a mamawh tel dawn.