Newcastle-in Spurs barakhaih

Newcastle player manto ber Joelinton-a'n English football-ah a goal  hmasa ber a khung a,  Steve Bruce hoten Pathianni zan khan Tottenham Hotspur 1-0 in an hneh. Spurs hian Champions League khelh tuma an elpui Manchester United leh Chelsea te nen point li ṭheuh an nei mek a ni.

Tottenham Hotspur Stadium-ah mualneitu Spurs-in 80% ball possession an nei a, shots pawh vawi 17 zet nei mah se goal an khung thei lo. Inkhelh banah Mauricio Pochettino chuan result chauh ni loin an khelh danah a lungawi loh thu a sawi.

Newcastle United chuan Hoffen-heim aṭangin pound maktaduai 40 zetin Joelinton an lalut a, kum ruk daih contract an ziahpui. Brazilian forward hian Bundesliga club tan match 35 a khelh aṭangin goal 11 a khung sak.

Kum 22 mi Joelinton hian English club tan match hnihah goal khung lo mah se a chakna a pholang tawh a, Spurs lakah goal khung a thiam tih a pholang. Minute 27-naah substitute Christian Atsu ball vawrh luh chu Joelinton hian hmun ruakah la perin  Hugo Lloris dan hman loh turin kawh zetin a pet lut - Spurs tlarhnung an muthlu.

Newcastle tan hian pound makta-duai 20 man Paraguay playmaker Almiron pawh a hmuhnawm a, Japanese forward Yoshinori Muto pawh khel rei lo mah se a tihtur chin a rawn hnehsawh hle.

Tun nipui transfer laia chhuak thei tura sawi Tottenham midfielder Christian Eriksen chu bench-ah la dah chhunzawm a ni a, Son Heung-min rawn let mah se  Pochettino naute goal hmaah an hriam tawk lo.

Goal khung khawl Harry Kane pawh amah thlawptu Erik Lamela leh Lucas Moura te nen an indip niin a lang. Argentine manager Poch-a'n an goal nawr dan thlak danglam turin Eriksen leh Giovani lo Celso te a luhtir a, awmzia a awm thui lo.

Spurs an vanduai tel ve bawk. Lo Celso ball pek latu Harry Kane chu Newcastle defender Jamaal Lascelles-a'n titlu mah se referee Mike Dean-a'n penalty turah a ngai lo - video assistant referee (VAR) Anthony Taylor-a'n a en nawn hnuah thutlukna a thlak lo.

Eriksen ball pass ṭha tak pawh  Moussa Sissoko-a'n changin hmun hlauhawmah cross mah se yard riat lek aṭangin Lucas Moura-a'n a pet over. Pochettino hoten goal an khung lo a, Newcastle 1-0 in an chak.