Badminton world champion PV Sindhu

PV Sindhu chuan thawnthu danglam leh ropui bik a ziak leh ta. Hyderabad nula hian Nozomi Okuhara hnehin Indian infiammi zinga BWF World Championships gold medal vaw chhuak thei hmasa ber a ni.

Pathianni zan khan Basel, Switzerland-ah final khelh niin Sindhu hian minute 38 chhung lekin Japanese nula hi 21-7, 21-7 in a hneh. Tun hma lamin he inelna lianah hian silver leh bronze medal pahnih ve ve a lo la tawh  a, khawvel huap badminton inelna ngaihhlutah medal panga ngawt a la tling ta.

Player ṭha pahnih an ni a, tun hma lama an intawn tawhnaah Sindhu hian 8-7 in record a nei ṭha zawk, an inthlauhna a tam loh avangin tun ṭumah pawh hian chak zawk tur rin thiam a harsa hle.

Game khatnaah Sindhu-i'n bul ṭan fuh zawkin 8-1 ngawtin hma a hruai a, 16-2 a nih hnuah tihsual nei zauh zauh mah se minute 16 chhung letin game a la. Game hnihnaah pawh 11-4 a hmahruai fal lehin a tawp thlengin a dingchang.

Kum 24 mi, 5ft 10 in a sang Sindhu hian a sanna hmangin na takin attacking game a khel leh a, court sir tak tak a vaw phei ṭhin; pumraw te zawk Okuhara-i'n a chet ranna hmangin bei let ṭhin mah se Indian nula a buai phah lo. Inelna ṭanhma lama a sawi ang ngeiin 'defence' lam a nei ṭha tel tawh bawk tih a hmuh theih.

Season hnih liam ta khan, Scotland khawpui pakhat Glasgow-ah BWF World Championships gold medal inchuhin Sindhu leh Okuhara te an inkhel tawh a, minute 110 zet an inkhelh hnuah Okuhara zawkin hnehna a chang - badminton match ropui an sawi apianga an sawi lan tur zingah a tel hial.

Nikum khan Sindhu-i'n final a lut nawn a, mahse Olympic gold medal match-a a hneh loh Carolina Marin bawk a ngam lo - kuminah season duhawm a hman hleih theih loh avangin tun ṭumah pawh hian beiseina sang tak neih ngam a har.

Basel khawpuiah Sindhu a zam lo a, tournament ṭhenkhat khel duh lo hial khawpa inbuatsaihna a neih ṭhat chu court chhungah a lang. Seeded pangana pek niin final thlengin harsatna lian tham a tawk lo, seeded pathumna Okuhara lakah pawh a tir aṭanga a tawp thlengin inkhel a thunun, a duh leh beisei gold medal a hlawh chhuak.

BWF World Championships bikah chuan Prakash Padukone-a'n Indian shuttler zinga medal la hmasa ber ni turin 1983 khan bronze medal a la a, a hnung zuitu an awm lawk lo.

Kum 2011 khan Jwala Gutta leh Ashwini Ponnappa te ṭangdun chuan women's doubles huanga bronze medal an hlawh chhuak ve leh hlauh a, London Olympic bronze medalist Saina Nehwal-i'n 2015 leh 2017 khan silver leh bronze medal a la bawk.

Tun season-ah PV Sindhu a rawn lang a, ani hian midang la tih ve theih ngai loh gold medal a la. Mipa singles lamah B Sai Praneeth chuan bronze medal a la ve bawk - ram dang mite lak tura ngaih ni ṭhin kha tunah chuan Indian player-ten an la thei tih nemngheh a ni tawh a, medal dangin a la zui ngei a rinawm.

•    Badminton player zingah Sindhu chauh hi Olympic, World Championships, Asian Games leh Commonwealth Games medal vawi khata kawl khawm kim thei a ni.

•    Sindhu hian World Championships vawi ruk a khelh tawhah medal panga a la a, hetiang zat medal la tura tourney mamawh tlem ber a ni. Hmeichhe player zingah gold, silver leh bronze medal la kim thei pahnihna a ni bawk.

•    Chinese nula Zhang Ning chuan World Championships-ah hian kum 2001-2007 inkar khan gold medal pakhat, silver medal leh bronze medal pahnih ve ve a lo la tawh.

•    August 25 kha PV Sindhu-i nu P Vijaya piancham a ni a, hlawhtlinna a chan chu a nu tan a hlan. "He medal hi ka nu tan ka hlan. Nu, happy birthday," tiin gold medal a lak hnuah a sawi.

Kum        A hmun            Medal

2019    Basel                Gold

2018    Nanjing            Silver

2017    Glasgow            Silver

2014    Guangzhou        Bronze

2013    Copenhagen    Bronze