Man City an tho lehnghal

Premier League champion lai Manchester City chuan Tottenham Hotspur lakah point hnih hloh mah se Pathianni zana Bournemouth nen an inkhelh ṭumin an talbuai phah lo a, 3-1 in hnehna an chang.

Man City tan Argentine forward Sergio Aguero-a'n goal hnih a khung bakah Raheem Sterling-a'n goal khat a khung a, Bournemouth tana substitute Harry Wilson freekick mawiin awmzia a awm pha lo.

Vitality Stadium-ah mikhual Manchester City an tlangnel a, captain David Silva chu kum 33 mi ni tawh mah se inkhel khaipa a la ni reng. Pep Guardiola hoten goal khung turin hun an mamawh rei lo a, Kevin de Bruyne khak sual chu minute 15-naah Aguero-a'n a khung.

First half tawp hma hretin David Silva pass chu Sterling-a'n ṭha zetin a khung a, English winger hi Pep-a hnuaiah nasa taka hmasawnin Lionel Messi nena khaikhin tawk pawh an awm ṭan ta. Cherries pawhin player class an nei ve tho a, Charlie Daniels khup hliam vanga lut Wilson chuan first half injury time-ah freekick aṭangin goal mawi a khung. Kum 22 mi Wilson hi Bournemouth-in Liverpool aṭanga loan hmanga a hawh a ni a, Premier League-ah goal hnih a khung tawh avangin Reds ṭantuten koh let hlan an nghakhlel ta hle.

Minute 64-naah David Silva ball chan per chu a hmun taka awm Aguero-a'n a khung a, 3-1 a nih tak avangin Bournemouth tan thawhchhuah theih a ni tawh lo.

Manchester City manager Pep Guardiola chuan, "Kan khingpuiten goal venhim an tum a, tlarhnung an rem phui chiah hian David-a theihna hi a lang ṭhin a, Bournemouth lakah a khel ṭha takzet. Ka player hmuh tawha ṭha berte zinga mi a ni," tiin Spanish midfielder chu a fak hle.

David Silva hian English club tan match 400 a inlanna chiah a ni a, Man City hian hnehna an chan avangin hmahruaitu Liverpool chu point hnih chauhin an pha lo.