India-in West Indies an sawp

India-in West Indies nen Test match vawi hnih an khelh tura a hmasa zawkah run 318-in hnehna an chang. Second Test hi August 30 - September 4 chhung hian Sabina Park, Kingston, Jamaica-ah khelh leh tur a ni.

August 22-26 chhung khan first Test hi khelh a ni a, ṭhumvawrah Windies chakin vawm hmasak an thlang. India-in innings hmasa zawkah run 297 chauh siam mah se Windies-in run 222 chauhin an chhanglet.

Second Innings-ah India tan Ajinkya Rahane century (102) leh Hanuma Vihari (93) te an che ṭha a, 343/7 an siam chu chakpui thamah ngaiin an duhtawk. West Indies-in chak turin run 419 an mamawh a, amaherawhchu bowler ṭha Jasprit Bumrah-a'n wicket nga lain run sarih chauh a pe a, Windies hi run 100 lek an siam tihin an thi fai vek.

Tuna Test match an khelh hi ICC World Test Championship a ni nghal a, India hian point 60 an hmu a, first Test-a New Zealand hnehtu Sri Lanka nen hmahruaitu an ni mek. Black Caps leh Sri Lanka hian P Sara Oval, Colombo-ah second Test an khel leh mek a, chak turin mikhual New Zealand a ṭha hle.