Hmalam panin Nadal a kal

Rafael Nadal-a'n Grand Slam champion hnem ber nih a tumna kawngah harsatna lian tham a tawk rih lo, a hmaa ding apiang chu a paltlang zel. Spanish tlangval hian Fabio Fognini hnehin Australian Open quarterfinal a inhlangkai.

Nimin inkhel dangah Daniil Medvedev pawh a chak, seeded palina hian world number 192 Mackenzie McDonald chu 6-4, 6-2, 6-3 in a hneh, tun hnaiah match 18 zet a chak zawn ta; quarterfinal-ah seeded pasarihna Andrey Rublev nen an inhmachhawn leh ang.

Russian tlangval pahnih Medvedev leh Rublev te hi tun hnaiah an khel ṭha dun a, chak zawk tur rin thiam a har. Rublev hian Casper Ruud lakah 6-2, 7-6 (7-3) a hma a hruai laiin a khingpui hi hliam vangin a khel chhunzawm thei lo.

Rod Laver Arena a inkhelah Nadal a chungnung, darkar khat leh minute 16 chhung lekin Fognini hi 6-3, 6-4, 6-2 in a hneh. Italian tlangval hian Nadal service vawi hnih a chhuhsak ve a, mahse a service ṭum ruk ngawt a hloh thung.

Seeded pahnihna Nadal khel a nghet ṭha tawk viau a, hard court chungah a ball vuak a na tawk viau. Chutihrualin tihsual (unforced errors) vawi 20 a neih chu a tam mah mah, semifinal lut tur chuan tih sual neih tlem a pawimawh dawn.

Nimin khan seeded pangana Stefanos Tsitsipas leh Matteo Berrettini te inkhel tur an ni a, mahse ban na vangin Berrettini a inlan thei lo. Greek tlangvalin inkhelh hah ngai loin hnehna a chang, a hmabaka ding tur chu Nadal a ni.

Australian Open khelh ṭan hma khan Nadal hi hnungzâng na vangin a buai, ram leh ram inelna ATP Cup-ah pawh Spain tan inlan thei loin a inhnukdawk hial. Mahse, Melbourne Park-a inelna pangngai an neih chinah chuan a hliam a dam tih a lang.

Australian Open 2009 champion hian a vawi 43 nan major tournament-ah quarterfinal a lut tling ta chiah, nomawi chawi hnem lama a tlukpui Roger Federer (20 titles) khum turin match thum chak chauh a hmabak tawh, chutihrualin player ṭha hlir pathum a zawna hneh a la ngai tihna a ni.

Kum 34 mi Nadal chuan, "Boruak a lumin a hnawng hle a, chumi hnu lawkah thli a rawn thaw leh bawk. Boruak inthlak vel a zirin khelh dan pawh a danglam a ngai ṭhin," a ti. Quarterfinal chinah chuan tu pawh hmachhawn se hna a awlsam tawh loh tur thu a sawi bawk.