Mizo club Aizawl FC an vanduai nawn

Aizawl FC chu Pathianni zan khan Sudeva Delhi nen Kalyani Stadium-ah an inkhel a, Mizo club hian inkhel thunun mah se penalty an hlah avangin 1-1 in an inhnehtawk. Tun season I League-ah hian kalphung thar a awm a, a sang parukin champion tur an zawng dawn. Aizawl FC hian match thum khelh hmabak an la nei a, pariatnaah an la awm avangin tun dinhmunah chuan relegate thei zingah an la awm.

Mizo club hian February 18, Ningani tlai dar 2:00 hian Mohammedan SC an hmachhawn dawn. Aizawl FC hian Kolkata club hi an hneh theih chuan a sang paruk zingah an invawrhkai thei ang. Mohammedan hian an match hnuhnung berah table mawngphaha awm Indian Arrows an hneh lo.

Aizawl FC-in Inrinni khan Nepal international forward Abhishek Rijal an lakluh thu an puang a, amaherawhchu Covid-19 dan zawm a ngaih avangin player thar hi a inkhung hrang a, chhawr theih a ni lo. Ugandan defender Richard Kassaga a inhliam a, captain Alfred Kemah Jaryan chiah foreigner a awm.

Coach Yan Law-a'n a player thlan dan aṭangin player a la enchhin a tih theih a, keeper Lalmuansanga aiah Zothanmawia (T. Mawia) a rawn inlan. Tlarhmaah MC Malsawmzuala leh David Laltlansanga te aiah Lalremsanga Fanai leh Lalliansanga (Notea) te an lut. Midfield leh defence erawh a rin ngaite bawk an lut.

Defence-ah Lalfelkima, PC Laldinpuia, Vanlalzuidika Chhakchhuak leh K. Lalmalsawma (Buanga) te an intlar a, midfield-ah Ramhlunchhunga, Alfred Kemah Jaryan R. Malsawmtluanga leh Brandon VL Remdika te an awm. Sudeva lamah Mizo tlangval pahnih Lalliansanga Renthlei leh Sairuatkima ten bul an ṭan ve bawk.

Aizawl FC-in nung takin inkhel bul an ṭan a, goal chance pawh insiam mah se goal chhuah hmasa zawkah an ṭang. Minute 19-naah defender Buanga'n ball kal dan chhut sualin box chhungah ball tauh ṭhelh a, Sudeva tan Kean Lewis-a'n kawh zetin a pet goal a, goalkeeper T. Mawia tan dah ngaihna a awm lo.

Mizo club-in si phurh sut tumin inkhel an thunun zui a, goal chance ṭha bik insiam an harsat. Chutihrualin box chhungah Ramhlunchhunga te hriam hret se chance ṭha bika chhuak thei tur chance narana chhuak ta a awm bawk. Minute 75-naah captain Alfred Kemah Jaryan a rawn inlar a, Liberian midfielder hian box pawn aṭangin kawh zetin a pet goal.

Aizawl FC an phur chho zel a, minute thum hnuah Sudeva player handball vangin Mizo club-in penalty an hmu. Mizo player zinga penalty pet thiam ber zinga mi R. Malsawmtluanga a rawn pen chhuak a, keeper Rakshit Kumar-a'n a dansak. AFC hian Trau an hneh loh ṭumin penalty an hlah tawh bawk a, an hun ṭha bawhpelh hi a uiawm hle.

Penalty hlah hnuah pawh freekick aṭangin chakna goal khung theihna tur an nei a, box pawna an freekick hmuh pahnih chu MS-a leh substitute MC Malsawmzuala ten an hmang ṭangkai thei lo. 

Aizawl FC coach Yan Law chuan, "Ka naute khelh danah ka lawm a, kan chak zo lo erawh kan vanduai a ni. Huaisen takin an khel a, an khelh danah sawisel tur a awm lo. Ka player-te hian an theihna an hre tawh a, team dang player aiin an ṭha zawk tih an inhria. Inrintawkna kan neih phawt chuan kan vanduai reng lo ang," tiin Vanglaini a hrilh.

Mizo club hi an vanduai hle. Sudeva nen hian 58% ball an chang a, goal attempt vawi 20 an nei a, goal zawnah vawi nga an pet chungin goal khat chiah an khung. Delhi club erawh vawi hnih chance an neiha goal zawna an pet awmchhun a goal.

Player thar chungchang sawiin Law chuan, "Abhishek Rijal hi team ti chak thei tur a ni a, Mohammedan SC-ah ka enkawl tawh. Goal khung thei tak a ni a, ram tana khel thei a nih avangin team tan a ṭangkai thei ang. Richard-a dinhmun hi kan zir chiang mek a, champion kan tum a nih chuan foreigner kan la neih belh hi chu a ṭul ang," tiin squad inthuam chak a la ṭul tur thu a sawi.