Pochettino tan fiahna hmasa - Barcelona chu!

Football ngainatute tan zaninah men rei a ngai leh dawn ta - zan  dar 1:30 hian Champions League last 16 first leg khel turin Barcelona chuan Paris Saint-Germain an mikhual dawn. 

Champions League nomawi chawi duha PSG-in an lakluh Mauricio Pochettino tan fiahna hautak a ni dawn a, Barcelona boss Ronald Koeman tan Nou Camp-a a cham chhunzawm zel dawn leh dawn loh hriltu inkhel a ni thei bawk ang. 

Pochettino-a'n, "Barcelona hmachhawn turin kan inpeih ang," tiin Catalan club hmachhawn tura an inbuatsaih tur thu a sawi a, an league match hnuhnung berah 2-1 in Nice an hneh. 

Tun season-a che fuh hleithei lo Barcelona inbuatsaihna pawh a ṭha a, PSG an mikhual hmaa an match hnuhnung berah Alaves chu 5-1 ngawtin an sawp - Messi-a'n goal hnih a khung avangin an ngaih a ngam sawt bawk ang.

Kum 2017 khan Champions League last 16-ah team pahnih hi an lo intawng tawh a, PSG-in an mualah 4-0 in hnehna an chang. Mahse, second leg-ah Barcelona-in an theihna an pholang a, football comeback ropui lantirin 6-1 in an chak. 

Inkhel pahnih belhkhawmah Barcelona-in 6-5 in hnehna an chang a, hetihlaia Unai Emery enkawl PSG an lawm thei lo a, match official lam thlengin an dem - phuba lakna remchang an nei ta.

Mahse, PSG ṭantute tan thu hriat nuam lo a awm a, Barcelona an chhuhsak, an thiampuipa Neymar chu hliam vangin an chhawr thei dawn lo - Angel di Maria a inlan thei dawn lo bawk nia sawi a ni. 

Hetihlai hian Julian Draxler leh season hmang ṭha tak Moise Kean-te chu player pahnih hmun ruak luah turin an awm a, Kylian Mbappe leh Mauro Icardi an la awm cheu bawk. Marco Verratti leh Rafinha inlan theih dawn leh dawn loh a la chiang lo thung. 

Barcelona-in tun season-ah tluk leh din an fawm a, an match hnuhnung bera goal nga ngawt an khung avangin inrintawkna erawh an neih belh ang tih a chiang - Alaves leh PSG ngaihfin erawh thil tih chi loh tawp a ni ang. 

Catalan club tana pawimawh ber erawh Messi 'form' phawt a ni a, Argentine forward hian a theihna anga a khel chhuak a nih chuan eng team pawh pet thla turin a ṭha tawk. 

Barcelona boss Koeman-a'n Messi pawimawhzia a hrechiang a, Dutch coach chuan, "Messi a awm chuan engkim hi a awlsam ṭhin. PSG petchhuak tur chuan a ṭhat dan bera Messi khel chhuak kan mamawh a ni," tiin a sawi. 

Messi hian tun season inelna hrang hrangah match 28-ah goal 19-a khung a, assist vawi riat a nei tawh bawk - PSG tana hna pawimawh hmasa chu Messi dan chah a ni. 

PSG hian season laihawlah an beisei ang result an neih loh avangin coach Thomas Tuchel an ban a, season hmasa Champions League final hruai thlengtu coach thlak turin Champions League 2019 final-a Tottenham Hotspur hruai thlengtu Pochettino an lalut. 

Ligue 1-a pahnihna ni mek PSG hian tualchhung football-ah chuan an duh ang nomawi an lo chawi fo tawh a, an beisei ber Champions League erawh an champion hlei thei lo - tun season-ah champion beiseiin Poch an lalut a, Argentine coach tan last 16-a tlak a thiang lo!

Barcelona-in hliam vanga chawl sa Ansu Fati, Gerard Pique, Philippe Coutinho leh Sergi Roberto tih loh chu player inhliam langsar an nei lo a, an ṭhat theih dan berin PSG an mikhual dawn ti pawhin a sawi theih. 

PSG-in an thiampuipa Neymar an chhawr theih dawn loh laiin La Liga-a beisei phak lo Barcelona tan chhuanlam tur a awm meuh lo a, Koeman-a'n Barca hi last 16 a paltlangpui zo lo a nih chuan a tan mualphona a ni ang.