Valencia ngamtu Real tan beiseina
Pathianni zan La Liga inkhelah Real Madrid chuan 2-0 in Valencia an hneh a, champion an beiseina a la bo bik lo - pahnihna an ni leh ta.
Real tan Karim Benzema leh Toni Kroos-ten goal khat ve ve an khung a, Valencia lamin a chhanletna tur an neih loh avangin Madrid khaw club an chak.
Zinedine Zidane-a nauten hnehna an chan avangin hmahruaitu Atletico Madrid nena an inkar chu point nga chauhin an sawr zim leh ta a, match hnihin an khel tam thung.
Valencia erawh hnehna an chan loh avangin top four aiin relegation zone an hnaih zawk a, team 20 inelna Spanish top flight league-ah 13-na an ni mek.
Benzema bawk
Real Madrid-in inkhel ṭantir aṭangin game an thunun nghal a, minute 12-na lekah an phu ang ngeiin Zidane nauten goal an khung - goal khungtu pawh tu dang ni loin Karim Benzema a ni.
French striker hian penalty area pawn hret aṭangin mawi zetin goal kil sirah a thlawh lut a, kum 33 mi goal khung hi 'class' huanga dah loh a mawi lo.
Benzema hian tun season inelna hrang hranga goal 17-a khungna chiah a ni a, assist vawi nga a nei bawk - tun season-ah Real tan ani aia khung hnem an awm lo a, a team tan a ṭangkai chhunzawm zel.
La Liga bikah Benzema hian goal 12-a khung tawh a, goal khung hnem lamah Luis Suarez (16 goals), Lionel Messi (15), Youssef En-Nesyri (13) leh Gerard Moreno (13)-a tluk lo mek.
Inkhel thununtu
Real-in first half chhung zawngin inkhel an thunun a, Benzema goal khung hnuah pawh Valencia-in Zidane-a naute hi an nawr let hleithei lo.
Madrid khaw club lamin Valencia keeper Jaume Domenech enchhinna an nei zauh zauh reng a, minute 42-naah an goal hnihna an khung ta nge nge.
German midfielder ṭha mi Toni Kroos chuan team thawhhona ṭha zarzoin an goal hnihna hi ṭha takin a khung - kum 31 mi midfielder hian tun season inelna hrang hrangah match 28 khelin goal hnih a khung a, assist vawi ruk a nei tawh bawk.
Valencia hian Maxi Gomez hmangin vawi khat Thibaut Courtois an enchhin tih loh chu chance an nei meuh lo a, inkhelh chhung zawngin vawi li shot an nei a, vawi khat chiah target-ah an pet ve.