Highlander tan Khalid-a 'magic' a thawk zel

NorthEast United-in coach aṭanga Gerard Nus an ban khan sawiselna tam tak an tawk a, an budget ngaihtuaha team a kaihhruai dan nena teh phei chuan Spanish coach hian sawiseltu aiin faktu a ngah zawk. 

Mahse, Nus-a ban a nih khan Liverpool academy lamah pawh lo thawk tawh coach hian match sarih chhung chu a zawnin Highlander hi a chakpui zo tawh lo a, NorthEast United thuneituten huaisen takin thutlukna an siam. 

Nus ban a nih aṭanga match nga an khelh leh meuh chuan Highlander-in sawiseltu an tawk tawh lo - Aizawl FC boss hlui Khalid Jamil-a enkawlna hnuaiah an la tlawm lo miau a!

NorthEast United hian Pathianni zan khan beisei tur nei tawh lo Odisha chu 3-1 in an hneh a, ISL semifinal khel turin an dinhmun an siam ṭha zel. 

Highlander-in minute kuana aṭangin goal an khung ṭan a, Luis Machado chu NorthEast United tana goal khung hmasa ber a ni - minute 10 hnu lawkah Deshorn Brown chuan a rawn khung chhunzawm ve bawk. 

Highlander-in an duhtawk mai lo. Minute nga a liam a, Machado hun a her chhuak leh. Portuguese winger hian Highlander tan an goal thumna a rawn khung a, first half-a tawp hma hauhin chak tur a chiang tawh. 

Hetichung hian Odisha an beidawng duh bik lo a, goal khung miah loa chawlhlawk hman duh loin Bradden Inman chuan si phurh a sut ṭhen - goal luh hi minute 45-na a ni. 

First half-ah goal li ngawt a lut a, second half-ah erawh goal hmuh tur a awm tawh lo - red card kan hmu thung. Hun tawp nan minute li chauh a awm tawh tihah NorthEast United left back Gurjinder Kumar chuan a yellow card pahnihna a hmu a, hnawhchhuah ni mah se Odisha tan thawhlehna hun a awm tawh lo. 

Ṭum dang ang thoin Lalengmawia'n NorthEast United tan inkhel bul a ṭan a, Vaivakawn rawlthar hian minute 90 hun a hmang tluan - a khel ṭha hle. 

Highlander tan hian Rochharzela chu minute 65-naah bench aṭanga luhtir a ni bawk a, Aizawl FC defender hlui Ashutosh Mehta pawhin Mizo club lama a lo zui tawh Khalid-a hnuaiah hmun pawimawh a chang zel. 

Odisha FC tan Jerry Mawihmingthanga leh Daniel Lalhlimpuia ten inkhel bul an ṭan a, khelmualah minute 90 hun an hmang dun - Odisha tana Inman-a goal awmchhun chu Serchhip forward Daniel-a siamsak a ni. 

Jerry-a'n goal a khungah inngai mah se referee-in foul vanga hamrik a ham hman avangin pawmsak a ni lo a, a chance ṭha neih dan chu Chanmari tlangval hian a chhawr thei lo bawk. 

ATK Mohun Bagan-in Mumbai City hnungzuiin playoff khel turin an hmun an tichiang a, Kolkata club hian Jamshedpur FC chu 1-0 in an hneh - Roy Krishna chuan inkhela goal awmchhun hi a khung. 

Jamshedpur tan Laldinliana Renthlei, Ricky Lallawmawma leh William Lalnunfela ten inkhel bul an ṭan a, Kolasib tlangval William hi Isaac Vanmalsawma chuan minute 59-naah a thlak. 

Bagan laka an tlawm avangin Jamshedpur tan playoff a harsa sawt dawn a, league match hnih chiah khelh tur an neih tawhah palina FC Goa chu point thumin an phak lo mek - an hmabak hi Mumbai City leh Bengaluru a nih avangin a awlsam lo ang. 

NorthEast United erawhin match thum khelh tur la nei chungin point 26 an nei a, Bagan leh Mumbai City chiah an phak lo mek - an hmabaka awm hi Chennaiyin FC, East Bengal leh Kerala Blasters a nih avangin a harsa lo tura ngaih a ni.