A chung berah Inter Milan

Juventus leh AC Milan chetsual laiin Inter Milan an che fuh thung a, an mikhual Lazio chu 3-1 in an hneh. Antonio Conte naute hian Serie A match 22 aṭanga point 50 hmuin hmahruaitu an ni.

Inter leh an hmelma Milan inkarah hian point khat chauh a awm. February 21, Inrinni zan hian 'Milan Derby' kan hmu zui dawn. Season dang zawng aiin a boruak a sangin a rinawm a, tun season 'Serie A Final' ang hiala ngaih theih a ni ang.

Pathianni zan San Siro a inkhelah beisei loh takin Lazio lamin ball an chang hnem zawk, mahse goal bulah erawh Inter Milan an hlauhawm zawk. Minute 22-naah Romelu Lukaku chuan club leh ram tana a goal 300-na ni turin penalty khungin a club hma a hruaipui.

European football khelh tum Lazio lamin substitute Gonzalo Escalante hmangin second half-ah siphurh an sut a, mahse Lukaku bawk an dang zo lo. Belgium international striker hian hmahruai nawnna goal a khung bakah Lautaro Martinez tan a siamsak bawk.

Hrem vangin Arturo Vidal chhawr thei lo mah se, kum 29 a tlin niah Christian Eriksen-a'n bul a ṭan thung. Denmark international hian a thiam a la theihnghilh lo, midfield aṭanga inkhel khaikhawmtu pawimawh a ni a, a bik takin goal nawr kawngah a ṭangkai.

Inter manager Conte chuan, "Tun hnaiah inkhel pawimawh kan hmachhawn hnem chungin hnehna kan chang zel, kan kal tluan dan thlir hian ka naute thawhrimzia leh an theihtawp an chhuahzia chu chiang takin a lang niah ka ngai, lawmna tur zel a ni rih.

"Team pahnih khan thil tum lian tak kan nei, chu chu point thum hmuh a ni. Kan khingpui kha match ruk chhung chak zawn thei an ni a, inrintawkna sang tak nen rawng lenglut mah se keini lam pawh kan chiai duh bik lo," tiin a sawi.

Pathianni zan inkhel dangah Atalanta chuan Luis Fernando Muriel Fruto goal khat hmangin Cagliari an hneh a, point40 hmuin parukna an ni. Napoli, Atalanta leh Lazio ten point 40 ṭheuh an nei a, palina Juventus an phak lohna chu point hnih chauh a ni - Serie A boruak a ngaihnawm zel dawn.