A sang pali zingah Frankfurt

Pathianni zan Bundesliga inkhelah Eintracht Frankfurt-in FC Cologne 2-0 in an hneh a, table-ah pathumnaah an awm. Inkhel dangah Wolfsburg leh Borussia Monchengladbach te goal awm loin an inhnehtawk.

Commerzbank-Arena-ah mualneitu Eintracht Frankfurt tan Andre Silva-a'n minute 57-naah goal hmahruai a khung a, Evan N'Dicka-a'n minute 79-naah a khung belh. Portuguese forward Silva hi German club tan hming a chher chho zel.

Kum 25 mi Andre Silva hian AC Milan-ah beisei a phak loh avangin loan-in Sevilla-ah a kal a, hemi hnu hian loan bawkin Frankfurt hi a zawm. German club hian Silva theihna hriatin nikum nipui bazarah khan a nghetin a an lalut a, Bundesliga-ah Robert Lewandowski chiah a tluk lo.

Lewy hian goal 24 a khung a, Frankfurt forward Silva hian goal 18 a khung. Portuguese forward hnuaiah hian Borussia Dortmund stirker Erling Haaland (15 goals), VfL Wolfsburg forward Wout Weghorst (14), Hoffenheim forward Andrej Kramaric leh VfB Stuttgart forward Silas Wamangituka (11) te an awm a ni.