Lukaku-a'n Inter tan a khung nghal

Romelu Lukaku chuan Inter Milan tana a match hmasa berah goal a khung nghal a, Antonio Conte hoten an mualah Serie A kaithar Leece chu 4-0 in an sawp.

Thawhṭanni zan inkhelah hian Inter Milan tan Marcelo Brozovic, Stefano Sensi, Lukaku leh Antonio Candreva ten goal khat ṭheuh an khung a, Leece forward Diego Farias chu minute 76-naah hnawhchhuah a ni.

Romelu Lukaku chuan kum 2017 khan Manchester United a zawm a, Belgian striker hian Old Trafford zawm tur hian a inngaihtuah buai loh thu a sawi. Old Trafford-a Lukaku sengluttu hi Jose Mourinho a ni a, Portuguese manager hnuaiah rinrawl niin khawih chet theih loh hial khawpin a pawimawh.

Ole Gunnar Solskjaer-a'n Mourinho a thlak hnuah Lukaku hi hnuchhawn a ni a, Marcus Rashford a elpha tawh lo. Belgian striker hian United-ah hmun paiwmawh a chang dawn lo tih a hriatin amah duhtu Antonio Conte a bel ta thung. Italian manager hian 2017 hian Chelsea a enkawl laiin Lukaku hi lakluh a tum tawh.

Tun nipui transfer-ah United-in Inter dilna hmasa an hnawl a, Italian club Conte chuan, "Romelu ka duhzia chu inhre tlang vek ang. Kan team-ah hian player pawimawh tak a nih theih ngei ka ring," tiin a sawi. Serie A club hian an manager player duh tak lalut turin sum an theh chhuak a, club record-in pound maktaduai 74-in Lukaku an lalut. Belgian striker hian match hmasa berah hmun pawimawh a chang nghal a, Lukaku hian season riat chhung chu Premier League-ah goal 10 a khung tling ziah a, Serie A-ah pawh match khat lekah goal a khung nghal.

Lukaku hian a club hnuhnung pali West Brom, Everton, Man Utd leh Inter Milan tana a khelh hmasak berah goal a khung vek.

Inter Milan-in an manager Luciano Spalletti thlaka tawnhriat nei ṭha zawk Antonio Conte an lakluh chhan chu Juventus hnuaia kun reng an duh loh vang a ni a, kum 2010 hnuah league nomawi an chawi tawh lo.

Conte hnuaia Serie A match hmasa berah Leece an hmachhawn a, harsatna an tawk lo. Minute 21-naah Marcelo Brozovic-a'n a hlai lut a, minute thum hnuah Stefano Sensi-a'n ṭha zetin a pet goal leh bawk. Player thar Lukaku-a'n Leece keeper dan per chu nangching hmasa berin minute 60-naah a club thar tan a khung. 

Minute 76-naah Leece striker Farias hnawhchhuah a ni a, Antonio Candreva-a'n yard 30 aṭangin a khung leh bawk. Inter Milan khingpui la nem deuh mah se Antonio Conte-a'n a ho avangin Juventus elpha tur zinga mi an ni ang.

Inter boss Antonio Conte chuan, "Romelu hian inngaitlawm takin Inter chhungkua a rawn zawm a, team tana thawk turin a inpe. Kan khelah khan êng chhe te hmuh tur a awm ṭan a, mahse nasa zawkin êng pekchhuah a ṭul," tiin hmasawn zel a ṭul thu a sawi.

Inter hian September 1 zanah Cagliari an hmachhawn ang a, Rossoblu (Cagliari sawina) hian an match hmasa berah Brescia 1-0 in an hneh lo.