Mangṭha Fernando; Kan la ngai dawn chauh che!

Fernando Torres-a'n Pathianni zan khan a professional career-a a match hnuhnung ber a khel a, Japan-ah Sagan Tosu tana inlanin Andrés Iniesta leh David Villa khelhna Vissel Kobe a hmachhawn. 

Spain tana hlawhtlinna tam tak a lo chharpui tawh Iniesta hian Torres match hnuhnung ber an khelh hmain a ṭhianpa thlahna thu a ziak a, Spanish chanchinbu lar El Mundo-ah tihchhuah a ni. 

A mak a ni tiraw, 'Aih' tiin min chhang hlek suh Fernando. He hmuna i match hnuhnung ber kan khel dun tur hi a mak ka ti a, 'mak, mawi leh duhawm' tia sawi hial ka duh zawk a ni. Khawvel letliama ding dun a, 'mangṭha' ti tura hringnunin Japan thleng thlenga min hruai thleng ta mai hi mak ka ti lo thei lo. 

Kum 20 zet chu a liam ta, kan inhmelhriat ṭanna kha. Naupang mai kan la ni a nih kha, ni e, tun thleng pawh hian ka tan erawh El Nino (Mipa naupang) ila ni reng tho mai. Football vangin kan inhria a, football vang vek hian in kalsan ngai lo ila ka duh a ni. 

Beiseinaa khat kan nih lai khan kan intawng a, European Under 16 (2001) champion ni tura i goal khung pawh ka la hre reng. Hliam vangin in lamah ka haw a ṭul a, ka tana i goal khung i hlan lai kha television aṭangin ka lo thlir reng asin!

Fernando, i la hre reng em? Trinidad and Tobago-a ka jersey-a i thu ziah kha? A hunlai kha chuan a awihawm loh a ni tiraw? Mahse, kan hlen ta miau si a nih kha. 

(Kum 2001 khan FIFA U17 World Cup-ah Spain an inlan a, an innghahna ber chu Fernando Torres leh Iniesta an ni. Mahse, group stage-ah Spain hi an tla a, Torres leh Iniesta ten a bik takin sawiselna nasa tak an tawk a, rawlthar tan tawrh zawh rual a ni lo. 

Coach Juan Santisteban chuan squad pumpui hmaah player pahnih hi a hau zui! Mahse, Torres chuan, "Engtikniah emaw chuan World Cup nomawi kan la chawi dun ang. Fernando Torres," tih thu jersey-ah a ziak a, Iniesta hi a pe - kum 2010 khan World Cup-ah hian an champion dun ta hial a ni)

Kha hun duhawm kan tawn hnuah kha chuan kan inphatsan tawh ngai lo a nih kha. Vienna, Johannesburg ... sawisen a ni lo, Xavi hnen aṭanga assist theihnghilh tawh loh turte, hriat reng tur goal kan khung ṭheuhte kha aw!

Ni e, kan ṭuanna mual a in ang reng lo, mahse kan hun tawp ber thlengin kan in kalsan ngai lo chu a nih hi. Min ṭhen hrang turin club leh jersey hi an ropui tawk lo. 

Khawpui hranah, Madrid leh Barcelona-ah kan cheng a, hmelma erawh kan ni ngai lo. Ṭhianṭha, jersey in ang lo ha ve mai kan ni - ni e,  a sen erawh kan ha dun fo tak e! Kan pahnih inkar thawnthu hi, mi tam tak hriat loh aṭanga inṭan a ni a, a kawng thui zia tak hi aw...

Spain chhuahsanin, i talent ropui tak hmutu Premier League lamah i kal a, Liverpool leh Chelsea tan i khel a nih kha. Atletico i lo kir khan mi dang ang thoin ka lo lawm ve em em ringawt mai a ni. A chhan maw? Football hi infiamna khawvela hlawhtlinna leh hlawhchhamna piahlamah hringnun min hriatthiam tirtu a ni tlat a ni. 

Ni e, Fernando, nang hian chu infiamna chu zahawm takin i siam a, he kan infiamna hi mawi takin min chhawp sak a ni. Ih maw, tunah hian i career duhawm taka ka chhiar sen loh goal i khung zozai leh nomawi i chawi chungchang ka sawi lo - i nungchang a ni ka sawi hi. He game, i khelhpuite, i khingpuite leh ni e, he football ngei mai zah taka i en ṭhinna kha sawi loh theih loh a ni tlat a ni. 

Engtikniah emaw chuan, hmun hla takah, mipuiin min bawr lohna, camera reng rengin min tin zawn lohna hmun khelmualah intawng leh ila, World Cup nomawi kan chawi hma zawnga kan thawnthu te kha sawi dun leh ang aw. 

Spain-a kan intawn leh hunah chuan i kawr min pek ngei kha ka rawn phawrh chhuak leh ang. Tuma hriat ve loh ka tana rohlu tak ni zui ta kha - ni e, a dik alawm, kan inṭhianṭhatna aia hlu zawk erawh ka hre lo. 

Zinkawng hlimawm tak kan zawh dun a, khawvel kil ber thlengin kan kal a nih kha. Vawiinah hian min han en teh, Tosu-ah nang leh kei kan inkhel a, match khat chauh kan hmabak ta. 

Villa leh kei min hmachhawn ang a, i haw dawn a ni. I chhungte chuan nghakhlel takin an lo hmuak che a ni mai thei, mahse nimin aiin vawiinah hian football chu a ngui sawt dawn a ni tih hi theihnghilh suh. I hmaa thil lo thleng apiang chu lawm takin pawm la, hlim em em ang che. 

Mahse, a mak zawng a mak a ni - i la haw lo chung hian ka ngai ṭan der che chu a nih hi!