Mbappe leh Cavani chawl rei dawn

Paris St-Germain striker pahnih Edinson Cavani leh Kylian Mbappe te chu thla khat chhung vel an chawlh a ngai dawn a, manager Thomas Tuchel tan Neymar chhuahtir ngawt a ngamawm loh zualin a rinawm.

PSG hian kartawp khan Toulouse 4-0 in an hneh, he inkhelah hian Uruguay international hi a khel bawr na vangin a tir lamah lakchhuah a ni a, inkhel chawhnu lamah Mbappe chu a malpui hliam vangin thlak a ngai ve leh bawk.

An hliam endik a ni a, Cavani hi kar li vel a chawl tura ngaih a ni a, tleirawl Mbappe hi kar thum vel a chawlh a ngaih hmel bawk - chiang takin an let hun tur hi ruat lawk ngawt theih erawh a ni lo.

French champion hian an player manto Neymar chu hliam vangin an chhawr theih chiah loh bakah match thum atan hrem lai mek a ni. Brazil international hi a club hlui Barcelona leh Spanish club lian dang Real Madrid nen sawi zawm a ni fo a, tun dinhmunah player pawimawh pahnih an hliam bawk avangin Tuchel tan Neymar chelh theih a pawimawh ang.