Indian tlangvalin set khatna a la Federer a chak thung

Roger Federer tan India tennis star Sumit Nagal hi awlsam taka hneh tura ngaih a ni, amaherawhchu set khatna an khelh lai erawh chuan Swiss star a talbuai. Federer-a'n hnehna chang tho mah se inkhelh banah Indian player nen an intawn chanchinin sawi zui a hlawh nasat phah.

Nimin zing US Open first round inkhelah Federer-a'n India tlangval Sumit Nagal 4-6, 6-1, 6-2, 6-4 in a hneh a, inkhel dangah Prajnesh Gunneswaran chu Daniil Medvedev lakah a tlawm bawk. India tlangval pahnih te chu round hmasa berah thlah liam nghal an ni.

Federer-a'n inelna lian bika hnehna a chan tawh zat belhkhawm chu match 1223 a ni a, a khingpui Nagal erawhin chak ni hmel a la hmu ngai lo a ni satliah lo, major tournament bikah chuan main draw a khelh vawi khatna a ni.

Arthur Ashe Stadium-ah Federer-a'n beisei angin inkhel bul a ṭan fuh lo, set khatna bikah vawi 19 ngawt unforced errors neiin, beisei loh tak maiin Nagal-a'n set a la! Set la mah se India tlangval tan chak beiseina a la sang chuang lo a, chutihrualin Federer laka set a la hi lawmna tham a tling.

Grand Slam vawi 20 champion tawh Federer chuan set hnihna aṭangin a zia a chhuah a, nghet taka ding chungin darkar hnih leh a chanve a inkhelh hnuah 4-6, 6-1, 6-2, 6-4 in hnehna a chang - match hnihnaah chuan Damir Dzumhur nen an inkhel leh dawn.

US Open ṭan a nih hma khan Nagal hian Grand Slam main draw khel tura tlin chu a beisei phak bak a nih thu a sawi tawh a, "Roger hi ka naupan lai aṭanga ka ngaihsan leh entawn a ni," tiin a khingpui tur a ngaihsan thu a sawi lawk hial.

Inelna tak an khel ta ngei a, Indian player zingah inelna pangngai (main draw) china Federer laka set la thei hmasa ber a ni. Tun hmain Indian player vawi thum a hmachhawn tawhah Roger hian set a la hloh ngai lo. Indian tennis tan hnehna rawn hlawh chhuak lo mah se bung thar a siamsak ta tho.

Indian Wells Masters 2000-ah khan Leander Paes chuan Federer hi a lo hneh tawh, mahse an intawnna hi qualifier round hnihna chauh a ni. India tennis legend Paes hi qualifier round 3-a a chak loh zui avangin inelna pangngai erawh a thleng phak lo.

Kum 38 mi Federer chuan, "Set khatna kha chu theihnghilh daih tlak a ni, ka service a ṭhat tawk loh bakah tihsual ka nei hnem hle. Inelna lianah chuan engtik lai mahin match hmasa ber hi chu a awlsam ngai lo," tiin a sawi.

Champion lai leh seeded pakhatna ni bawk Novak Djokovic chuan harsatna nei loin Roberto Carballes Baena chu 6-4, 6-1, 6-4 in a hneh. Serbian tlangval hian New York-a a inlan hnuhnung pathumah final a thleng vek a, kuminah pawh champion tura rinkai a ni ang.

World number 1 Djokovic (kum 32) hian nomawi a chawi leh a nih chuan 17 a neihna tur a ni dawn a, Grand Slam title lak hnem lamah kum 38 mi Federer (20) leh kum 33 mi Rafael Nadal (18) te a hnaih tawh dawn hle. Argentine tlangval Juan Ignacio Londero nen an inhmachhawn leh dawn a ni.

Inkhel dangah Grand Slam vawi thum champion tawh Stan Wawrinka pawh a dingnghet. Swiss tlangval hian Jeremy Chardy chu 6-3, 7-6(4), 4-6, 6-3 in a hneh a, seeded pangana Daniil Medvedev, world number 84 Hugo Dellien leh Japan tlangval Kei Nishikori te pawhin an khingpui ṭheuh an hneh bawk.