Nadal chak laiin Thiem leh Tsitsipas an tla

Rafael Nadal-a'n vawi thum a champion tawhna US Open-ah harsa lo takin first round a paltlang a, thleng sang thei tura ngaih Dominic Thiem leh Stefanos Tsitsipas te erawh chak ni hmel hmu loin an zinkawng a tawp nghal.

Nimin zing Arthur Ashe Stadium-a inkhelah Nadal hian darkar hnih leh minute 11 chhungin John Millman lakah 6-3, 6-2, 6-2 in hnehna a chang. Spanish tlangval hian New York khawpuia inelna lianah hian first round bikah vawi 15 hnehna a chang tling chiah a, chak loh a la nei ngai lo.

Season hmasa khan Nadal-a'n inelna tir lamah a khel fuh tawk lo, match thum aṭangin set 13 ngawt a khel. Semifinal thleng mah se Juan Martin del Potro nen an inkhelh laiin a khel tluan thei lo a, set hnih hnuah a inhnukdawk.

Kum 33 mi Nadal tan set hloh loa hnehna chan hi chanchin ṭha a ni. Nadal chuan, "Rilruah chak loh hlauhthawnna a awm lo, inringtawk takin ka khel tluan thei a ni," a ti. Break point vawi nga a hman ṭangkai bakah a service a hum vek avangin a khel nghet ṭha hle.

Spanish tlangval hian second round-ah chuan Thanasi Kokkinakis a hmachhawn dawn, round sang lama a hmachhawn theih zingah - Fernando Verdasco, Marin Cilic leh John Isner te pawh an la awm, awlsam takin final thlen theih a ni dawn lo.

World number 2 Nadal chuan, "Ka hmachhawn leh tur hi player ṭha tak a ni a, a bik takin forehand a nei ṭha hle. Khingpui hlauhawm tak a nih dawn avangin ṭha taka ka khelh chhuah theih a ngai dawn. Chumi hnuah match dang chu ka ngaihtuah chauh ang," tiin Australian tlangval a hmachhawn tur chungchang a sawi.

French Open final vawi hnih khel tawh Thiem hi player lian dangte elphak ber tura ngaih a ni. Amaherawhchu, Austrian tlangval hi Thomas Fabbiano lakah 6-4, 3-6, 6-3, 6-2 in a chak lo nghal, vawi 58 tehmeuh unforced errors a neih avangin ama tihsual neih hnem a tuar tih a chiang hle.

Seeded palina Thiem hian season hmasa khan quarterfinal a thleng hial, mahse kuminah a khel ṭha tawk lo. US Open hma Grand Slam hnuhnung zawk Wimbledon-ah pawh khan hneh nei loin a lo tla tawh bawk - a khelh fuh leh fuh loh ni a inthlau hle a ni.

Inkhel dangah Stefanos Tsitsipas pawh Andrey Rublev lakah 6-4, 6-7 (5-7), 7-6 (9-7), 7-5 in a chak lo bawk. Kum 21 mi, Greek tlangval hian Australian Open-ah khan Roger Federer a hneh a, a lakah mipui beiseina sang hle mah se Wimbledon ang bawkin hneh nei loin a tla.

Seeded pariatna Tsitsipas chuan, "Court chhungah hian ṭha taka ka khel chung pawhin a pawimawh hunah tak point ka hmu lo leh ṭhin, sang tak thlen tum mah ila chan tawka lungawi thiam zirchhuah nan pawh a 

ṭha hle," tiin a sawi.