UEFA Player of the Year zaninah a hriat dawn Ronaldo vs Messi vs Van Dijk

Zanin dar 10:30-ah Champions League draw neih a ni dawn a, chu ai maha mipuiin an nghahhlelh chu UEFA Player of the Year chawimawina sem tel a ni tur hi a ni. 

Europe-a football thuneitu sang ber UEFA chuan he chawimawina sang dawng thei tur vote hmanga an thlan hnuah hming pathum an chhawp chhuak a, Lionel Messi, Cristiano Ronaldo leh Virgil van Dijk te an ni. Barcelona thiampuipa Messi leh Juventus forward Ronaldo ten an ram league-ah nomawi an chawi laiin Liverpool kulhpui Virgil van Dijk erawh Champions League champion a ni thung. 

Zanina awards semchhuah tur zingah hian Goalkeeper of the Season, Defender of the Season, Midfielder of the Season, Forward of the Season, Women's Player of the Year leh Europa League Player of the Season an thlang dawn bawk. 

January 2018-a Liverpool-in Virgil van Dijk pound maktaduai 75-a an lei khan mi tam takin a to uchuakah an ngai a, tunah erawh an lei tlawmzia an hre tawh thung ang. 

VVD hian Liverpool tlarhnung a thuam ṭha a ni satliah mai lo. A bula khelte thlengin inrintawkna a siamsak a, Champions League nomawi meuh a chawipui ta hial. Kum 28 mi defender hian minute 1000 chhung chu amah bumtu a tawng lo - season hmasa Premier League-ah khan clean sheets 20 a nei a, European top five league-ah ani aia clean sheet ngah an awm lo. 

Premier League bika tackles 38-a neihah 74% a hlawhtling a, clearance a neih zat chu 199 a tling. Champions League-ah match 12 a khel a, clean sheet vawi nga a nei. Netherlands chu UEFA Nations League final a luhpui bawk. 

Lionel Messi nomawi chawi zat, goal khung zat, assist neih zat leh mimal chawimawina dawn zat zawng zawng ziak dawn ila hmunin min daih lo ang. 

Messi hian Spanish La Liga-ah Barcelona a champion pui a, season ṭantira an duh ber nia a sawi Champions League nomawi erawh a chawi loh avangin a buk a rit lo deuh mai thei. Hetihrual hian Champions League top scorer niin match 10-ah goal 12 a khung tho a, assist pathum a neih zat nen phei chuan goal 13-ah a inrawlh tihna a ni. 

La Liga-ah goal 36 ngawt a khung avangin European Golden Shoe a dawng a, mahse 'Messi' a nih miau avangin a season ṭha bera sawi erawh a ni chuang lo - Messi te ang tifamkim tur chuan 'treble' a ngai. 

Portuguese forward hi a kalna hmun apianga sulhnu ropui hnutchhiah thei khawpa thawm na a ni a, kumina he chawimawina dawng thei tura chhawpchhuah a ni leh ta hi a mak lo. Ronaldo hian Juventus a pan chhan ber chu Champions League nomawi chawipui a ni a, a tum ber a hlawhtlin rih miau loh avangin chawimawina a dawn loh pawhin a vui loh ṭum tak a ni ang. 

Kum 34 mi forward hian Champions League nomawi a chawi lo chungin round of 16 first leg-a Atletico Madrid laka 2-0 a an tlawm hnua second leg-a hattrick a siam ringawt pawh kha chawimawina dawnpui tham a tling. 

Portugal international buk ti rit tur erawh UEFA Nations League-ah an ram team a champion pui kha a ni a, a buk rit belhchhah turin Serie A nomawi a awm bawk. 

Messi an thlang? 

Liverpool leh Chelsea ten UEFA Super Cup an khelh zan khan UEFA Player of the Year thlan tur hi a put ru nia sawi a ni a, lehkhaa a lan dan chuan Messi chuan he chawimawina hi a dawng. 

Argentine forward hian 252 points a nei a, a hnuai chiahah VVD chuan 224 points neiin Ronaldo chuan 181 points a hmu. Zaninah he lehkha put ru hi a tak a nih leh nih loh a hriat ang.