New York-ah Osaka a kir
US Open hmeichhe singles champion lai Naomi Osaka chu a hringnuna hun pawimawh a tawn hmasakna Arthur Ashe Stadium-ah a kir leh a, Japanese nula hian fiahna harsa angreng tak paltlangin second round a inhlangkai.
Thawhlehni zan inkhelah Osaka hian Russian nula kum 20 mi Anna Blinkova chu 6-4, 6-7 (5-7), 6-2 in a hneh a, a match lehpekah chuan world number 53 Magda Linette nen an inhmachhawn leh dawn a ni.
Osaka a vannei
Flushing Meadows, New York-a inkhelah Osaka hi a tir lamah a talbuai, set hmasa berah 4-1 in a hniam nghal. Mahse, a zawna game nga la letin set a la a, set hnihnaah erawh set point a hmuh a chhawr ṭangkai theih loh hnuah tie break-ah a vanduai.
Set hnuhnung ber an khelhah erawh world number 1 Osaka a chungnung a, break point vawi thum a hmuh chhawr ṭangkaiin harsa lo takin a tlang. Inkhel inhnehtawk leh hun pawimawh bera chhal ngam set khatna bika a chungnung zawk kha a vanneihpui a tih theih.
Kum 21 mi Osaka chuan, "Hetiang ang em em hian ka hlauthawng ang tih ngaihna ka hre bik lo, a nihna takah chuan ka khelh dan phung kha ka man har hle. Set thumnaah khan ka theihna ka pholang dawn ṭan chauh a ni," a ti.
Season hmasa khan Arthur Ashe Stadium-ah hian Osaka-i'n a Grand Slam nomawi hmasa ber a chawi a, final inkhel hnuhnawm takah Serena Williams a hneh. American nula Serena hi nasa taka a thinrim avangin tawnhriat nei tlem zawk Osaka hi a thlabar viau hial a ni.
Halep a tlang
Wimbledon champion Simona Halep pawhin hnehna chang turin set thum a khelh a ngai. Romanian nula hian tualchhung player Nicole Gibbs chu 6-3, 3-6, 6-2 in a hneh a, second round-ah world number 116 Taylor Townsend a hmachhawn leh ang.
Inkhel dangah tun hnaia mi hriat hlawh Coco Gauff pawhin Anastasia Potapova 3-6, 6-2, 6-4 in a hneh. Kum 15 mi Gauff hi Wimbledon neih zawh taka inlan thei naupang ber a ni a, tun ṭumah pawh hian mipui mit fukna zingah a tel phak.
US Open final vawi hnih khel tawh Caroline Wozniacki erawh Alison Riske lakah 6-2, 1-6, 3-6 in a chak lo nghal, ani hian French Open champion hlui Jelena Ostapenko a hmachhawn leh ang.