English Football League aṭangin Bury an paih chhuak

Indian football legend Bhaichung Bhutia a lo khelh tawh avanga India-ah pawh hriat hlawh tak Bury FC chu sum lama an tlak chhiat avangin English Football League aṭanga paihchhuah an ni. 

Bury khelmual Gigg Lane bula an club chanchin ngaichangtu fan-ten mittui an dang zo lo a, kum 1992-a Maidstone United hnua EFL aṭanga club-in paihchhuah an tawh lehna hmasa ber an tawng. BBC reporter Mike Minay chuan, "Gigg Lane-a fans pungkhawmte chuan EFL aṭanga paihchhuah an ni tih an hriat rual hian an mittui an dang zo lo. An ṭap a, an hun tawn chu awih har an ti em em mai a ni," a ti.

EFL executive chair Debbie Jevans chuan, "League history-a hun thim ber kan tawng mek a ni. Bury players, staff leh fan-te tan hun hrehawm tak a ni ang tih ka hriatthiampui," a ti a, thutlukna chu duh reng vanga siam an nih bik loh thu a sawi. 

Premier League club hlui Bolton Wanderers chu EFL aṭanga paihchhuah theih dinhmunah an ding mek bawk a, League One club hi September 12, tlai dar 4:29 thleng hun pek an ni. 

Engtia thleng nge? 

Bury hian hman aṭang tawhin chanchin neuh neuh an nei fo. April khan League Two aṭangin League One an inpetkai a, hlim ni nei khat tak Bury fan-te hlimin an lam. 

Mahse, hetihlai pawh hian he club hi sum lamah an talbuai tawh a, December 2018 khan Steve Dale chuan chhanchhuah theih inbeiseiin Stewart Day hnen aṭangin £1 in a lei. Dale hian a beisei angin Bury a chhan chhuak thei bik lo a, club a lei tirha a hriat ang aiin English club chu an lo buai ruk thu a sawi. 

Bury hian players leh staff-te hlawh chu a hun takah an pe thei lo ṭhin a, leiba tam tak an nei bawk. EFL lam chuan inchingfel turin hun an tiam sak a, an inchingfel hman ta lo a ni. 

EFL chuan Bury hi a tirah chuan kar hmasa Zirtawpni thleng kha inchingfel turin hun a pe a, EFL-in a hriat duh thilte an thlen lo a nih pawhin club neitu thar nei hman turin an ti. 

Hetihlai hian club neitu  Steve Dale chuan BBC hnenah Bury a hralh tawh thu a sawi a, an harsatna aṭanga ding chhuak turin hma an la mek thu a sawi. EFL lam pawhin he thusawi hi ringin Thawhlehni tlai dar 5:00, keini lama zan dar 9:30 thleng kha hun an pawhsei sak leh a, mahse Dale-a thusawi angin thil a thleng lo. 

Bury leh an club lei tum C&N Sporting Risk te an indawr fel hman lo a, keini lam sanaa nimin zing dar 3:35 khan EFL hian thuchhuah siamin Bury hi paihchhuah an ni ta.  

Tun dinhmunah chuan Bury hi engtinnge an kal zel dawn a la hriat rih lo a, players, staff leh stadium thlengin an kal zel dan tur a la hriat loh. EFL chuan thutlukna an siam hma hian Bury chu paihchhuah an nih pawhin 2020-21 aṭanga league khel turin dilna an thlen leh theih thu an sawi a, mahse division hniam ber aṭanga bul an ṭan ṭhat a ngai thung. 

He thu buatsaih a nih lai hian Bury kal zel dan turah eng thuchhuah mah siam a la ni lo a, League One-ah chuan club 23 awm sain league an khelh chhunzawm ang. League One aṭang hian team pathum chauh an relegate dawn thung a, hei hi Bury an awm tak loh vang a ni - League Two aṭangin team pali an kai thar thung ang.