Zanin dar 1:45-ah Everton Vs Man City

Goodison Park-ah zanin dar 1:45 hian Everton leh Manchester City te an inkhel dawn. Pep Guardiola hote hi inelna hrang hrangah vawi 16 an chak zawn tawh a, Premier League champion tura rinkai lawrlak an ni leh tawh.

Carlo Ancelotti hote erawhin an match hnuhnung berah Fulham 2-0 in an hneh lo a, chutihrualin table-ah pasarihnaah an awm mek. Toffees hian point 37 an hmu a, an chunga awm Liverpool point thumin pha lo mah se match hnihin an khel tlem zawk.

Man City midfielder Kevin De Bruyne leh Fernandinho ten training an zawm leh tawh a, Everton hmachhawn tur erawhin an la inpeih lo. City-in match hnuhnung berah Tottenham 3-0 in hneh a, goal hnih khungtu Ilkay Gundogan chu hliam vangin a dinhmun a chiang lo.

Germany international Gundogan awm lo pawh ni se tun hnaia Phil Foden che ṭha hian Manchester City ṭantute a ti hlim hle. Man City academy aṭanga inzir chhuak Foden hian Pep Guardiola hnuaiah hmun pawimawh a chang chho a, a record pawh a chhuanawm hle.

Kum 20 mi Foden hian Man City tana Gabriel Jesus record siam chu a hnaih chho a, Brazilian forward hi kum 21 tlin hmain Man City tan goal 23 (16 goals leh 7 assists) ah a inrawlh. Foden hian kumin May 28-ah kum 21 a tling dawn a, Jesus-a record hi goal rukin a la pha lo.

Chutihrualin zanina Everton nen an inkhelh hunah erawh record lam thlir loin Foden-a telna Man City hian point thum hmuh an tum ang. Toffees hian Dominic Calvert-Lewin, Jordan Pickford leh Allan bakah James Rodriguez te an chhawr theih vek a rinawm a, Goodison Park-a inkhel tur an nih bawk avangin Man City meuh tan pawh point thum hmuh a awlsam lo ang.