Tuchel hnuaiah Werner-a'n goal a khung

Goal khung tura lei, mahse goal khung hleithei si lo Timo Werner chuan goal a khung ve leh ta. German striker hian goal a khung bakah goal khat dang sual chhuak bawkin Chelsea chu Newcastle United lakah 2-0 in hnehna a chanpui.

Thawhlehni zan Premier League inkhelah Werner-a cross an lo dan per chu Olivier Giroud-a'n goal hmahruai atan a khung a, chawlhlawk hma deuhin nipui laia an lakluh hian tlu chungin an goal hnihna a khung bawk.

Inkhel dangah West Ham United chuan Declan Rice, Issa Diop leh Ryan Fredericks te goal khat ṭheuh hmangin Sheffield United 3-0 in an hneh. David Moyes nauten season duhawm an hmang a, season tharah European football khelh an beisei ngam.

Thomas Tuchel enkawl Blues hian league match 24 aṭanga point 42 hmuin palina dinhmun an luah, an hnuaia awm West Ham nen an point a inzat - champion Liverpool aiin point hnihin an sang zawk, a sang pali zinga tel tum in um a ngaihnawm dawn.

Nikum November 7 khan Werner-a'n Sheffield lakah goal a khung a, a hnuah match 14 chhung zet goal khung loin a awm - minute 1,000 vel a khung lo tihna a ni. Magpies lakah inkhel bul ṭan mah se goal khung tura rinkai a ni lem lo.

Tuchel hnuaia khelhna hmun chang thar Marcos Alonso ball tauh chu Werner hian khung theihna nei mah se, goal zawnah a kal lo. Minute 31-naah huaisen takin box chhungah ball a luhpui a, a cross chu lo dang per mah se Giroud tana khung nuam tawk chiah a ni.

Goal luh aṭangin minute kua chiah a liam hman, corner aṭanga ball kal an tauh per chu a hmun dik taka lo awm Werner-a'n an goal hnih nan a khung. A goal khung hma hian a offside em tih VAR hmanga endik zui a ni a, video assistant referee chuan goal atan a pawm.

Werner goal khung vangin an lawm a, keeper man tam Kepa Arrizabalaga-a'n October 17 hnua league match inkhel bul a ṭan lehna hmasa berah goal a chhuah lo bawk, manager thar Tuchel awm chinah point 15 hmuh theih zinga 13 an hmuh avangin lawmna tur a tam.

Steve Bruce enkawl Newcastle hian an league match hnuhnung pathum zinga pahnihah hnehna an chang thei a, inrintawkna sang tak nen Stamford Bridge pan mah se an beisei leh duh ang result erawh an hlawh chhuak zo ta lo.

Jamaal Lascelles-a'n Tammy Abraham a hliam vangin bench aṭangin Giroud a lut a, France international striker hi goal hmahruai khungtu a ni ta si. Arsenal striker hlui hi Magpies ngamtu a nih avangin, league bikah pawh an lakah goal kua a khung ta.

Newcastle player them thiam Miguel Almiron leh Allan Saint-Maximin ten ṭum dang an phak lo a, Gunners aṭanga loan hmanga an hawh Joe Willock chuan hun ṭha bera ngaih tawng mah se a ball tauh chu Kepa-a'n a chhuah duh lo. Goal hnih a luh hnuah Almiron-a'n goal ban hrulah a pet chhuak bawk.

Magpies manager Bruce chuan, "Inkhel tir lamah kan che fuh tawk lo, box chhungah striker pahnih ven loha kan dah kha a pawi lai chu a ni. Second half-ah erawh ṭha takin kan khel thung," a ti. Bruce-a naute hian Pathianni zanah Manchester United an lenchilh ang.

Frank Lampard thlaktu Thomas Tuchel kaihhruaina hnuaiah Chelsea-ah danglamna a thleng a, champion beisei ngam tawh chiah lo mah se a sang pali zinga tel turin beisei an nei sang tawh hle - pathumna Leicester City an phak lohna pawh point li chauh a ni.

Blues manager Tuchel chuan, "Palina nih theihna kawng a inhawng tih kan hria a, kan hun ṭha neih bawhpelh loa kan ti hlawhtling thei hi a lawmawm takzet. A tirah kha chuan palina nen kan inkar a zau hle, tunah chuan zawi zawiin kan ti zim zel.

"Tun ṭumah pawh khan kan khel a nghet ṭha em em a, tuna inrintawkna kan neih ang hi neih chhunzawm zel thei ila tih hi ka duhthusam a ni. Engkim mai kha duhthusam angin a kal vek a ni ber mai," tiin a naute khelh danah a lungawi hle.

Chelsea hian February 20, Inrinni zanah Southampton an lenchilh zui leh ang.