Osaka hmachhawn tur Serena

Australian Open hmeichhe semifinal hmasa zawk khel tur a hriat ta. Naomi Osaka hmaah Serena Williams a ding dawn, nimin khan player pahnih hian an khingpui ve ve hnehin quarterfinal an paltlang a ni.

Quarterfinal chin hi Rod Laver Arena-ah khelh a ni a, inkhel hmasa zawkah seeded pathumna Osaka hian Hsieh Su-wei chu darkar khat leh minute ruk chhung lekin 6-2, 6-2 in a hneh a, semifinal thleng tur hian set khat chauh a la hloh.

Japanese nula hian a match hmasa zawka Garbine Muguruza nen an inkhelh ṭumin match point vawi hnih an inchhanhim hram a, nimina Hseih nen an intawn chuan harsatna lian tham tawh a nei tawh lo.

Inkhel hnuhnung zawkah Serena-i'n champion tura rinkai zinga mi Simona Halep chu 6-3, 6-3 in a hneh, hnehna chang tur hian inkhel tawp lamah a zawnin game nga lai a la thei. Chak tur hian darkar khat leh minute 21 chhung hun a hmang a ni.

Kum 39 mi Serena hian Grand Slam nomawi 23 a chawi tawh a, record nei ṭha ber Margaret Court (24 titles) nih rual turin match hnih chak a la hmabak. A khingpui tur Osaka hi US Open final-a a hneh loh tawh niin a record siam tur a lo dang tawh, kuminah in dan nawn tir a tum lo ang.

Vawiin hian hmeichhe singles quarterfinal match hnih khelh a ni leh dawn. World number 1 Ashleigh Barty leh seeded 25-na Karolina Muchova an inhmachhawn ang. Tualchhung nula Barty hian match li a khelh tawh chinah set a la hloh miah lo a ni.

Vawiin Inkhel Tur - Quarterfinal

Ashleigh Barty    05:30 AM    Karolina Muchova

Jennifer Brady    07:30 AM    Jessica Pegula

February 18, Ningani - Semifinal

Serena Williams    vs    Naomi Osaka