Ashwin-a'n India a chakpui

Chennai-a khelh second Test-ah India-in khawtual tlangval Ravichandran Ashwin chet ṭhatna hmangin England an hneh let a, series-ah 1-1 a ni chiah. Chennai tlangval Ashwin hian century a siam a, wicket riat la bawkin Virat Kohli hoten hnehna an channa kawngah a che ṭha hle.

Ṭhumvawrah India an chak a, bat hmasak an thlang. Men in Blue hian run 329 an siam a, run 161 zet vaw chhuaktu Rohit Sharma zarah mualneitu dinhmun a ṭha. England bat hun a thleng a, Test ranking-a spinner ṭha ber Ashwin-a'n wicket nga lain run 43 chauh a pe. Mikhual team hi run 134-ah an thi fai vek a, ni thum khelh tur la a awm bawk avangin India chu chak chiang saah a ngaih theih tawh.

Second innings-ah India dinhmun ṭha siam tih ṭhat belh turin Ashwin-a'n century (106) a siam a, captain Virat Kohli-a'n run 62 a siam ve bawk. Men in Blue hian second innings-ah run 286 an siam a, England tan target an chhawpsak chu 482 a ni.

Joe Root-a hote tan beisei a tlem a, India spinner-ten an chungah zah ngaihna an lantir lo. Gujarat spinner Axar Patel chuan run 60 pein wicket nga a la a, Ashwin-a'n wicket thum lain run 53 a pe bawk.

England hian run 164 chauh an siam a, Test match hi ni nga khelh tur ni mah se ni linaah chak zawk an awm der. India-in run 317 in hnehna an chang. Test match pahnih khelh hmabak hi Ahmedabad-ah khelh a ni ang.

Second Test ni hnihna aṭangin inkhel entu awm an phal ṭan a, India captain Virat Kohli chuan a ngai hlu hle. Kohli chuan, "Mahni khelmuala entu awm loa khelh kha a mak duh ang reng hle. Mipui an awm hnu khan nasa takin danglamna a siam. Inningsh pahnih belkhawmin run 600 kan siam tling a, inkhel duhthusam a ni," tiin a sawi.