Bielefeld-in Bayern an chelh

Thawhṭanni zan khan Allianz Arena-ah tlai thei dinhmuna ding Arminia Bielefield leh mualneitu Bayern Munich 3-3 in an inhnehtawk. Club dinhmun thlirin Bielefeld hian World champion Bavarians an chelh a tih theih a, a nihna takah erawh Bundesliga champion lai hi a suttu zawk an ni.

Bayern hian match 21 aṭangin point 49 an hmu a, pahnihna RB Leipzig aiin point ngain an hmu sang zawk. Hansi Flick-a hote hian Inrinni zan hian pathumnaa awm mek Eintracht Frankfurt an tlawh lehnghal ang.

Munich-ah vur a tla nasa a, vur karah phaitual hnim a lang pheuh pheuh. Team ṭha zawk Bayern-in harsatna an tawk a, defender Niklas Sule a che ṭha tawk lo. 

Anderlecht aṭanga loan hmanga Arminia Bielefeld zawmtu Michel Vlap-a'n German club tana a khelh hmasak bera goal khung turin minute kua chiah a mamawh. Ducth midfielder Vlap hian minute 37-naah corner petin Amos Pieper-a'n a tauh goal leh bawk.

Second half-ah vur tla tih fai a ni a, Bayern-in inkhelh awlsam sawt. Bavarians goal khung khawl Robert Lewandowski-a'n minute 48-naah a khung nghal a, amaherawhchu minute khat hnuah Andreas Voglsammer cross chu Christian Gebauer-a'n a tih goal lehnghal avangin Arminia Bielefield 3-1 in hma an hruai.

Hansi Flick-a hoten point hlawhchhuah tumin na takin an nawr let a, Corentin Tolisso-a'n minute 57-naah tauh lutin si phurh a sut ṭhen. Left wing back ṭha mi Alphonso Davies-a'n kawh zetin minute 69-naah siphurh sutna goal a khung a, Bayern hian chakna goal khungna hun pawh nei mah se goal dang hmuh tur a awm tawh lo.

Bayern hi FIFA Club World Cup khel zo hlim an ni satliah lo a; coronavirus vang leh inhliam vangin Thomas Muller, Leon Goretzka, Javi Martinez leh Serge Gnabry te an inlan thei lo. Defender Jerome Boateng chu mimal thil avangin a la khel thei lo a, match ṭhat hma chiahin Douglas Costa chuan a keah hliam a nei bawk.

Chutihrualin Arminia Bielefeld hote an khel ṭha tih zep tur a awm lo a, Uwe Neuhaus-a nauten an huaisenna rah sengin Allianz Arena-ah point khat hlu tak an hlawh chhuak a ni.