Marco Rose-a'n Dortmund a enkawl dawn

Borussia Monchengladbach manager Marco Rose chuan club thuneitute hnenah season thara Borussia Dortmund enkawl turin nipuia a chhuah tur thu a sawi.

Gladbach sporting director Max Eberl chuan, "Kar tam tak inbiakna kan neih hnuah inremna kan nei thei ta lo a, pawi kan ti hle," tiin Rose an chelh thei lo chu pawi a tih thu a sawi.

Leipzig-a piang Marco Rose hi a inkhelh hun laiin defender a ni a; VfB Leipzig, Hannover 96 leh Mainz 05 tan khelin player langsar a ni pha lo. 

Kum 36 a nihin Lokomotive Leipzig a enkawl ṭan a, kum khat bak a daih lo. Austrian club Red Bull Salzburg enkawl zuiin hetah hian hlawhtlinna a chhar a, youth team chu 2016-17 seaosn khan UEFA Youth League-ah a champion pui.

Senior team-ah mawhphurhna chelh zuiin RB Salzburg hi Austrian Bundesliga-ah ṭum hnih champion puiin Austrian Cup-ah vawi khat a chawi bawk. July 2019 aṭang khan Glagbach hi a enkawl ṭan a, tunah hian Bundesliga-ah pasarihnaah a awm pui a, Champions League leh DFB Pokal-ah an la dam bawk. German Cup-a hian season thara enkawl tur Dortmund nen quarterfinal-ah an inhmachhawn ang.