Utah Jazz an sang zel
NBA regular season kal laiah Utah Jazz an che fuh chhunzawm zel. Nimin zing inkhelah Jazz hian Philadelphia 76ers 134-123 in an hneh a, tun hnaiah a zawnin match riat zet hnehna an chang ta.
Vivint Smart Home Arena a inkhelah bench aṭanga rawn lut Jordan Clarkson a hmuhnawm. Clarkson hian point 40 zet a nei thei a, Western Conference hmahruaitu hian season kal laia match 23 an chakna an tawng - ṭum nga chauh chak loh an nei.
76ers tan Ben Simmons-a'n point 42 a neih bakah assist vawi 12 zet neiin double-double a nei thei, mahse a ṭhiante zingah amah thlawptu an awm ṭha tawk lo, a vawi 10 nan an tlawm.
Inkhel dangah Kyrie Irving chuan season kal laia a point neih hnem ber ṭum (40 points) tawngin Brooklyn Nets chu Sacramento Kings lakah 136-125 in hnehna a chanpui.
Malpui hliam vangin Kevin Durant inlan thei lo mah se Brooklyn tan buaina tur a awm lo, 3-points ringawt pawh vawi 27 neiin club record an siam a, Irving leh James Harden an la awm avangin an ṭha tawk - a zawnin match thum an chak ta.
Stephen Curry-a'n minute 30 chhunga point 36 neiin Cleveland Cavaliers lakah Golden State Warriors chu 129-98 in hnehna a chanpui. Team pahnih hian 2015-18 chhung khan NBA Finals vawi li an khel a, tun hma ang bawkin Curry chu danglamna thlentu a la ni reng.
NBA Results
Chicago Bulls 120 - 112 Indiana Pacers
Houston Rockets 119 - 131 Washington Wizards
Atlanta Hawks 112 - 123 New York Knicks
Philadelphia 76ers 123 - 134 Utah Jazz
Brooklyn Nets 136 - 125 Sacramento Kings
Cleveland Cavaliers 98 - 129 Golden State Warriors
Miami Heat 118 - 125 LA Clippers